സഞ്ജു വിജയ ശിൽപ്പിയാവുമോ? മൂന്നാം ടി20യിൽ സൂക്ഷിക്കേണ്ടത് ഈ താരങ്ങളെ

രണ്ടാം ടി20യിൽ മൂന്ന് വിക്കറ്റിന്റെ തോൽവി ഏറ്റുവാങ്ങിയ ഇന്ത്യ, അഞ്ച് മത്സരങ്ങളുടെ പരമ്പരയിലെ മൂന്നാം മത്സരത്തിൽ ദക്ഷിണാഫ്രിക്കയെ നേരിടാൻ തയ്യാറെടുക്കുകയാണ്. സൂര്യകുമാർ യാദവിന്റെ നേതൃത്വത്തിൽ, ഡർബനിലെ ആദ്യ മത്സരത്തിൽ 61 റൺസിന്റെ മികച്ച വിജയത്തോടെ ഇന്ത്യ പരമ്പരയ്ക്ക് സ്വപ്നതുല്യമായ തുടക്കമാണ് കുറിച്ചത്.

എന്നിരുന്നാലും, രണ്ടാം മത്സരത്തിൽ സഞ്ജു സാംസൺ ഡക്കിന് പുറത്തായതോടെ ഇന്ത്യൻ ബാറ്റിങ് നിര തകർന്നു.. വരുൺ ചക്രവർത്തിയുടെ അഞ്ച് വിക്കറ്റ് പ്രകടനം പാഴാക്കി, ഇന്ത്യൻ ടീം ഉണർന്നു കളിച്ച ദക്ഷിണാഫ്രിക്കയ്‌ക്കെതിരെ പരാജയപ്പെട്ടു. ട്രിസ്റ്റൻ സ്റ്റബ്‌സിന്റെ പോരാട്ടവീര്യം ആതിഥേയരെ പരമ്പരയിൽ സമനിലയിലെത്തിച്ചു.

സെഞ്ചൂറിയനിൽ പരമ്പരയിൽ ലീഡെടുക്കാൻ ഇരുടീമുകളും പരിശ്രമിക്കുമ്പോൾ, ഏതൊക്കെ താരങ്ങളാണ് മത്സരത്തിൽ നിർണായക പങ്ക് വഹിക്കാൻ സാധ്യതയുള്ളതെന്ന് നോക്കാം.

3. വരുൺ ചക്രവർത്തി

ഇന്ത്യൻ ടി20 ടീമിലേക്ക് തിരിച്ചെത്തിയതിനുശേഷം വരുൺ ചക്രവർത്തി പന്ത് കൊണ്ട് മിന്നും പ്രകടനമാണ് കാഴ്ചവക്കുന്നത്. രണ്ട് മത്സരങ്ങളിൽ നിന്ന് അഞ്ച് വിക്കറ്റ് പ്രകടനമടക്കം എട്ട് വിക്കറ്റുകൾ നേടിയ ചക്രവർത്തിയെ നേരിടാൻ ദക്ഷിണാഫ്രിക്കൻ ബാറ്റർമാർ കുഴങ്ങുകയാണ്. തന്റെ വൈവിധ്യമാർന്ന പന്തുകൾ കൊണ്ട് ബാറ്റർമാരെ കുഴപ്പിക്കാനുള്ള കഴിവ് കണക്കിലെടുക്കുമ്പോൾ, പ്രത്യേകിച്ച് മധ്യ ഓവറുകളിൽ, ചക്രവർത്തി വീണ്ടും ഇന്ത്യയുടെ വിശ്വസ്തനായ ബൗളറായിരിക്കും.

2. ജെറാൾഡ് കോയ്റ്റ്‌സി

രണ്ടാം ടി20യിൽ ഫാസ്റ്റ് ബൗളർ തന്റെ ഓൾ റൗണ്ട് പ്രകടനം കൊണ്ട് ആതിഥേയർക്ക് അവിസ്മരണീയമായ വിജയം സമ്മാനിച്ചു. 19 റൺസിന്റെ വിലപ്പെട്ട ഇന്നിംഗ്‌സിന് പുറമെ, അഭിഷേക് ശർമ്മയുടെ വിക്കറ്റ് നേടിയ ജെറാൾഡ് കോയ്റ്റ്‌സി, നാല് ഓവറിൽ 25 റൺസ് വഴങ്ങി ഒരു വിക്കറ്റ് എന്ന രീതിയിൽ മിന്നും പ്രകടനമാണ് കാഴ്ചവച്ചത്.

വാസ്തവത്തിൽ, പരമ്പരയിൽ ദക്ഷിണാഫ്രിക്കയുടെ ഏറ്റവും മികച്ച ബൗളറാണ് അദ്ദേഹം, 15.50 ശരാശരിയിൽ നാല് വിക്കറ്റുകൾ ഇതിനോടകം നേടി. അതിനാൽ, സെഞ്ചൂറിയനിലെ സാഹചര്യങ്ങൾ ഫാസ്റ്റ് ബൗളിംഗിനെ സഹായിക്കുമെന്ന് കണക്കിലെടുക്കുമ്പോൾ, ന്യൂബോളിൽ കോയ്റ്റ്‌സി നിർണായകമായേക്കാം.

1. സഞ്ജു സാംസൺ

ടി20 യിൽ നിന്ന് രോഹിത് ശർമ്മ വിരമിച്ചതിനെത്തുടർന്ന് ടോപ്പ് ഓർഡറിലേക്ക് സ്ഥാനക്കയറ്റം ലഭിച്ചതിനുശേഷം സഞ്ജു സാംസൺ തന്റെ ടി20 കരിയറിന്റെ ഗ്രാഫ് തന്നെ മാറ്റിയിരിക്കുകയാണ്. അടുത്തിടെ തുടർച്ചയായി രണ്ട് ടി20 സെഞ്ച്വറികൾ നേടി സഞ്ജു ചരിത്ര പുസ്തകങ്ങളിൽ ഇടം നേടി.

കഴിഞ്ഞ മത്സരത്തിൽ സഞ്ജു പൂജ്യത്തിന് പുറത്തായെങ്കിലും, ഈ മത്സരത്തിൽ തിരിച്ചുവരാനുള്ള കഴിവ് അദ്ദേഹത്തിനുണ്ട്. കളിയോടുള്ള സമീപനം തന്നെ മാറ്റിയ സഞ്ജു ഇപ്പോൾ തന്റെ തുടക്കങ്ങളെ മികച്ച സ്കോറുകളാക്കി മാറ്റുന്നു. അദ്ദേഹത്തിന്റെ സമീപകാല പ്രകടനങ്ങൾ കണക്കിലെടുക്കുമ്പോൾ, സെഞ്ചൂറിയനിൽ ബാറ്റ് കൊണ്ട് ഇന്ത്യയുടെ വിജയശിൽപ്പി സഞ്ജു തന്നെയാവാനാണ് സാധ്യത..