ദ്രാവിഡിനെതിരെ സഞ്ജുവിന്റെ പിതാവിന്റെ വിമര്‍ശനം, ദൂരവ്യാപക പ്രത്യാഘാതം ഉണ്ടാക്കിയേക്കും
ഒരു ഇന്ത്യന്‍ ക്രിക്കറ്ററെന്ന നിലയില്‍ സഞ്ജു സാംസണിന്റെ വളര്‍ച്ചയില്‍ നിര്‍ണായക പങ്കുവഹിച്ച രാഹുല്‍ ദ്രാവിഡിനെ പിതാവ് വിമര്‍ശിച്ചത് വലിയ ചര്‍ച്ചയായിരിക്കുകയാണ്. തുടര്‍ച്ചയായ തഴയപ്പെടലുകള്‍ക്ക് ശേഷം മികച്ച പ്രകടനം കാഴ്ചവെച്ച് കൈയടി നേടുന്ന സഞ്ജുവിന് ഈ വിവാദം തിരിച്ചടിയാകുമോ എന്നാണ് ആരാധകര്‍ ആശങ്കപ്പെടുന്നത്.
ഗൗതം ഗംഭീറും സൂര്യകുമാര്‍ യാദവും നല്‍കുന്ന പിന്തുണയുടെ കരുത്തില്‍ തുടര്‍ച്ചയായി രണ്ട് ടി20 സെഞ്ച്വറികള്‍ നേടിയ സഞ്ജുവിന്റെ മിന്നും ഫോമിന് പിന്നാലെയാണ് പിതാവ് മുന്‍ ക്യാപ്റ്റന്‍മാരെയും കൂടെ പരിശീലകന്‍ ദ്രാവിഡിനേയും വിമര്‍ശിച്ചത്. ധോണി, കോഹ്ലി, രോഹിത് എന്നിവര്‍ക്കൊപ്പം ദ്രാവിഡിനെയും വിമര്‍ശിച്ചത് ആരാധകര്‍ക്ക് അസ്വസ്ഥതയുണ്ടാക്കി.
സഞ്ജുവിന്റെ വളര്‍ച്ചയുടെ തുടക്കം രാജസ്ഥാന്‍ റോയല്‍സിലൂടെയാണ്. രാജസ്ഥാനില്‍ കളിച്ച് മികവ് തെളിയിക്കാന്‍ സഞ്ജുവിനെ സഹായിച്ചത് ദ്രാവിഡാണ്. സഞ്ജുവിന്റെ കരിയറിലെ നിര്‍ണായകമായ വളര്‍ച്ചാ കാലഘട്ടത്തില്‍ ദ്രാവിഡ് കൂടെയുണ്ടായിരുന്നു. ദ്രാവിഡ് പരിശീലകനായിരുന്നപ്പോഴാണ് സഞ്ജുവിന് ഇന്ത്യയുടെ ടി20 ലോകകപ്പ് ടീമില്‍ ഇടം ലഭിച്ചത്.
ഇന്ത്യന്‍ ക്രിക്കറ്റ് ടീമിന്റെ പരിശീലക സ്ഥാനമൊഴിഞ്ഞ ദ്രാവിഡ് നിലവില്‍ രാജസ്ഥാന്‍ റോയല്‍സിന്റെ പരിശീലകനാണ്. അടുത്ത സീസണില്‍ സഞ്ജു നായകനാവുന്ന രാജസ്ഥാനില്‍ ഇരുവരും തമ്മിലുള്ള ബന്ധം ടീമിന്റെ പ്രകടനത്തെ ബാധിക്കുമെന്ന ആശങ്കയുണ്ട്.
സഞ്ജുവിന്റെ വിവാഹത്തില്‍ പങ്കെടുക്കുകയും താരത്തിന് പിന്തുണ നല്‍കുകയും ചെയ്ത ദ്രാവിഡിനെ വിമര്‍ശിച്ചത് ശരിയായില്ലെന്ന് ആരാധകര്‍ അഭിപ്രായപ്പെടുന്നു. സഞ്ജുവിന്റെ ഭാവിയെ പ്രതികൂലമായി ബാധിക്കുന്ന തരത്തിലുള്ള പ്രതികരണമാണ് പിതാവിന്റേതെന്നും അവര്‍ പറയുന്നു.
എന്നാല്‍, നിരവധി തഴയപ്പെടലുകള്‍ക്ക് ശേഷം മികച്ച പ്രകടനം കാഴ്ചവെക്കുന്ന സഞ്ജുവിന്റെ പിതാവ് വൈകാരികമായി സംസാരിച്ചപ്പോള്‍ സംഭവിച്ച പിഴവാണിതെന്നും വിവാദങ്ങള്‍ അനാവശ്യമാണെന്നും ഒരു വിഭാഗം ആരാധകര്‍ പറയുന്നു.
