മഞ്ഞപ്പതാക പിഴുതുമാറ്റി ലൂക്ക, അവസാനം ഇടിച്ചിട്ട് രാഹുല്‍, നടന്നത് ഓണതല്ല് തന്നെ
തിരുവോണ ദിനത്തില്‍ ജവഹര്‍ലാല്‍ നെഹ്റു സ്റ്റേഡിയത്തില്‍ കേരള ബ്ലാസ്റ്റേഴ്സും പഞ്ചാബ് എഫ്സിയും തമ്മിലുള്ള ഐഎസ്എല്‍ മത്സരം അവസാന മിനിറ്റുകളില്‍ അടിയുടെ വക്കോളമെത്തി. നിരവധി നാടകീയ സംഭവങ്ങളും തര്‍ക്കങ്ങളുമാണ് അവസാന സമയത്ത് നടന്നത്. മത്സരത്തിന്റെ 86-ാം മിനിറ്റ് വരെ ഗോള്‍രഹിതമായി തുടര്‍ന്ന മത്സരം, അവസാന നിമിഷങ്ങളില്‍ മൂന്ന് ഗോളുകള്‍ പിറന്നതോടെ ആവേശത്തിന്റെ കൊടുമുടിയിലെത്തി.
രണ്ടാം പകുതിയിലെ ഉണര്‍വ്
ആദ്യ പകുതിയില്‍ കാര്യമായ സംഭവങ്ങളൊന്നും ഉണ്ടായില്ലെങ്കിലും, രണ്ടാം പകുതിയില്‍ പകരക്കാരായി എത്തിയ താരങ്ങള്‍ ബ്ലാസ്റ്റേഴ്‌സിന് ഉണര്‍വ് നല്‍കി. ക്യാപ്റ്റന്‍ അഡ്രിയാന്‍ ലൂണയുടെ അഭാവം പ്രകടമായിരുന്നെങ്കിലും, ഹെസൂസ് ഹിമെനെയും വിബിന്‍ മോഹനനും ടീമിന്റെ ആക്രമണത്തിന് മൂര്‍ച്ച കൂട്ടി.
അവസാന മിനിറ്റുകളിലെ ഗോള്‍ വര്‍ഷം
86-ാം മിനിറ്റില്‍ മുഹമ്മദ് സഹീഫ് വരുത്തിവച്ച പെനാല്‍റ്റിയിലൂടെ ലൂക്കാ മയ്സെന് പഞ്ചാബിനെ മുന്നിലെത്തിച്ചു. ബ്ലാസ്റ്റേഴ്‌സ് ബോക്‌സിനുള്ളിലേക്ക് കടന്നുകയറിയ പഞ്ചാബ് താരം ലിയോണ്‍ അഗസ്റ്റിനെ സഹീഫ് വലിച്ചിട്ടതിന് ലഭിച്ച പെനല്‍റ്റി ലക്ഷ്യത്തിലെത്തിച്ചാണ് ലൂക്കാ മയ്സെന് പഞ്ചാബിനെ മുന്നിലെത്തിച്ചത്. മൈതാനത്തെ കോര്‍ണര്‍ പോളിലുണ്ടായിരുന്ന മഞ്ഞ പതാക തന്റെ ജഴ്‌സിയൂരി മൂടിയായിരുന്നു ലൂക്കാ മയ്‌സെന്റെ ഗോളാഘോഷം. കേരള ബ്ലാസ്റ്റേഴ്‌സ് ആരാധകരെ 'പ്രകോപിപ്പിക്കാവുന്ന' ആഘോഷം.
എന്നാല്‍, ഇന്‍ജുറി ടൈമില്‍ ഹെസൂസ് ഹിമെനെ ബ്ലാസ്റ്റേഴ്‌സിനായി സമനില ഗോള്‍ നേടി. തൊട്ടുപിന്നാലെ ഫിലിപ് മിര്‍യാക് പഞ്ചാബിനായി വീണ്ടും ലീഡ് നേടിക്കൊടുത്തു.
കെ.പി. രാഹുലിന്റെ വിവാദ ഫൗള്‍
മത്സരത്തിന്റെ അവസാന നിമിഷങ്ങളില്‍ കെ.പി. രാഹുല്‍ നടത്തിയ ഫൗളാണ് കൂടുതല്‍ വിവാദങ്ങള്‍ക്ക് വഴിവെച്ചത്. ഹൈബോള്‍ പിടിച്ചെടുക്കാനുള്ള ശ്രമത്തിനിടെ ലൂക്കാ മയ്സെനെ രാഹുല്‍ ഇടിച്ചിട്ടു. ഇതോടെ കുപിതരായ പഞ്ചാബ് എഫ്സിയുടെ കോച്ചിങ് സ്റ്റാഫും താരങ്ങളും രാഹുലിനെ ലക്ഷ്യമിട്ട് ഓടിയെത്തിയെങ്കിലും, റഫറി ഉള്‍പ്പെടെയുള്ളവര്‍ ഇടപെട്ട് രംഗം ശാന്തമാക്കി.
മഞ്ഞക്കാര്‍ഡില്‍ ഒതുങ്ങിയ ഫൗള്‍
കടുത്ത ഫൗള്‍ നടത്തിയ രാഹുലിന് മഞ്ഞക്കാര്‍ഡ് മാത്രമാണ് ലഭിച്ചത്. ഇത് പല കോണുകളില്‍ നിന്നും വിമര്‍ശനങ്ങള്‍ക്ക് ഇടയാക്കിയിട്ടുണ്ട്. എന്തായാലും, തിരുവോണ ദിനത്തിലെ ഈ ഐഎസ്എല്‍ പോരാട്ടം ആവേശം നിറഞ്ഞതും വിവാദങ്ങള്‍ നിറഞ്ഞതുമായ ഒരു മത്സരമായി ഓര്‍മ്മിക്കപ്പെടും