10 കല്‍പനകള്‍, ലംഘിച്ചാല്‍ ഐപിഎല്‍ ബാന്‍, ടീം ഇന്ത്യയെ പിടിച്ച് കുലുക്കി ബിസിസിഐ
സമീപകാലത്തെ തുടര്‍ച്ചയായ പരാജയങ്ങളും ഡ്രസ്സിങ് റൂം വിവാദങ്ങളും പരിഗണിച്ച് ഇന്ത്യന്‍ ക്രിക്കറ്റ് ടീമിനായി ബിസിസിഐ പുതിയ അച്ചടക്ക മാര്‍ഗ്ഗനിര്‍ദ്ദേശങ്ങള്‍ പുറത്തിറക്കി. സോഷ്യല്‍ മീഡിയയിലൂടെ ഇക്കാര്യം ബിസിസിഐ പരസ്യമാക്കുകയും ചെയ്തു.
പുതിയ മാര്‍ഗ്ഗനിര്‍ദ്ദേശങ്ങള്‍:
ആഭ്യന്തര ക്രിക്കറ്റ് നിര്‍ബന്ധം: ടീമിലെത്തണമെങ്കില്‍ ആഭ്യന്തര ക്രിക്കറ്റില്‍ നിര്‍ബന്ധമായും കളിക്കണം.
ടീമിനൊപ്പം യാത്ര: എല്ലാ കളിക്കാരും ടീം ബസില്‍ തന്നെ യാത്ര ചെയ്യണം.
ബാഗേജില്‍ നിയന്ത്രണം: ലഗേജിന്റെ എണ്ണത്തിലും ഭാരത്തിലും നിയന്ത്രണം.
സ്റ്റാഫിന് നിയന്ത്രണം: കളിക്കാര്‍ക്ക് പേഴ്‌സണല്‍ സ്റ്റാഫിനെ കൊണ്ടുപോകുന്നതിന് നിയന്ത്രണം.
ബാഗുകള്‍ അയക്കല്‍: സെന്റര്‍ ഓഫ് എക്‌സലന്‍സിലേക്ക് ബാഗുകള്‍ അയക്കുന്നതിന് നിയന്ത്രണം.
പരിശീലനം നേരത്തേ വിടരുത്: പരിശീലന സെഷനില്‍ നിന്ന് ആരും നേരത്തെ പോകരുത്.
ഫോട്ടോഷൂട്ടിന് വിലക്ക്: പരമ്പരയ്ക്കിടെ വ്യക്തിപരമായ ഫോട്ടോഷൂട്ടുകള്‍ക്ക് അനുമതിയില്ല.
കുടുംബത്തോടൊപ്പം യാത്ര: കുടുംബാംഗങ്ങള്‍ക്കൊപ്പം യാത്ര ചെയ്യുന്നതിന് നിയന്ത്രണം.
ബിസിസിഐ ചടങ്ങുകള്‍: ബിസിസിഐയുടെ ഔദ്യോഗിക പരിപാടികളില്‍ നിര്‍ബന്ധമായും പങ്കെടുക്കണം.
നാട്ടിലേക്കുള്ള മടക്കം: പരമ്പര അവസാനിക്കുന്നതിന് മുമ്പ് നാട്ടിലേക്ക് മടങ്ങാന്‍ പാടില്ല.
ലംഘിച്ചാല്‍ കടുത്ത ശിക്ഷ:
ഈ മാര്‍ഗ്ഗനിര്‍ദ്ദേശങ്ങള്‍ ലംഘിക്കുന്ന കളിക്കാര്‍ക്ക് ഐപിഎല്ലില്‍ നിന്ന് വിലക്കും മാച്ച് ഫീസ് നഷ്ടവും ഉള്‍പ്പെടെയുള്ള കടുത്ത ശിക്ഷ നേരിടേണ്ടിവരും. ഈ നടപടികള്‍ ഇന്ത്യന്‍ ക്രിക്കറ്റിന് ഒരു പുതിയ ഉണര്‍വ് നല്‍കുമെന്ന് ബിസിസിഐ പ്രതീക്ഷിക്കുന്നു.
എന്തുകൊണ്ട് ഈ കര്‍ശന നടപടി?
ന്യൂസിലന്‍ഡിനും ഓസ്‌ട്രേലിയയ്ക്കുമെതിരായ പരമ്പരകളിലെ ദയനീയ പ്രകടനം.
ഡബ്ല്യുടിസി ഫൈനല്‍ യോഗ്യത നഷ്ടമായത്.
ഗൗതം ഗംഭീറിന്റെ നേതൃത്വത്തിലുള്ള ഡ്രസ്സിങ് റൂം പ്രശ്‌നങ്ങള്‍.
ടീമിനുള്ളിലെ രഹസ്യങ്ങള്‍ ചോരുന്നത്.