അമ്പരപ്പിക്കുന്ന സര്‍പ്രൈസ് താരങ്ങള്‍, ഇന്ത്യയ്‌ക്കെതിരെ ഒന്നാം ടെസ്റ്റിനുളള ഓസ്ട്രേലിയന് ടീം പ്രഖ്യാപിച്ചു
ബോര്‍ഡര്‍ ഗവാസക്കര്‍ ട്രോഫി ആദ്യ ടെസ്റ്റിനുള്ള ഓസ്ട്രേലിയന് ടീമിനെ പ്രഖ്യാപിച്ചു. പെര്‍ത്തില്‍ നടക്കുന്ന മത്സരത്തില്‍ ഇന്ത്യയ്ക്കെതിരായ 13 അംഗ ഓസ്ട്രേലിയന് ടീമിനെയാണ്് ക്രിക്കറ്റ് ഓസ്ട്രേലിയ പ്രഖ്യാപിച്ചിരിക്കുന്നത്. നവംബര്‍ 22 ന് പെര്‍ത്തിലെ ഒപ്റ്റസ് സ്റ്റേഡിയത്തില്‍ വെച്ചാണ് ആദ്യ ടെസ്റ്റ് നടക്കുക.
ഓപ്പണിംഗ് സ്ഥാനത്ത് നഥാന്‍ മക്‌സ്വീനി ഓസ്ട്രേലിയയ്ക്കായി അരങ്ങേറ്റം കുറിക്കും എന്നതാണ് ഏറ്റവും ശ്രദ്ധേയമായ തീരുമാനം. ഓപ്പണറായിട്ടായിരിക്കും മകസ്വീനി കളിയ്ക്കുക. പരിചയസമ്പന്നരായ മാര്‍ക്കസ് ഹാരിസ്, കാമറൂണ്‍ ബാന്‍ക്രോഫ്റ്റ്, യുവതാരം സാം കോണ്‍സ്റ്റാസ് എന്നിവരെ മറികടന്ന് മക്‌സ്വീനി പെര്‍ത്ത് ടെസ്റ്റിനുള്ള ഓപ്പണിംഗ് സ്ഥാനം സ്വന്തമാക്കിയത്. അതേസമയം, റിസര്‍വ് വിക്കറ്റ് കീപ്പറായി ജോഷ് ഇംഗ്ലിസിനെയും ടീമില്‍ ഉള്‍പ്പെടുത്തിയിട്ടുണ്ട്.
'ടെസ്റ്റ് ക്രിക്കറ്റിന് അനുയോജ്യമായ ഗുണങ്ങള്‍ നഥാന്‍ പ്രകടിപ്പിച്ചിട്ടുണ്ട്, കൂടാതെ ആഭ്യന്തര ക്രിക്കറ്റില്‍ അടുത്തിടെ മികച്ച റെക്കോര്‍ഡും അദ്ദേഹത്തിനുണ്ട്. സൗത്ത് ഓസ്ട്രേലിയയ്ക്കും ഓസ്ട്രേലിയ എയ്ക്കും വേണ്ടിയുള്ള അദ്ദേഹത്തിന്റെ പ്രകടനങ്ങള്‍ അദ്ദേഹത്തിന് അനുകൂലമായി. ടെസ്റ്റ് തലത്തില്‍ അവസരത്തിന് അദ്ദേഹം തയ്യാറാണെന്ന ഞങ്ങളുടെ വീക്ഷണത്തെ ഇത് പിന്തുണയ്ക്കുന്നു. അതുപോലെ, ഷെഫീല്‍ഡ് ഷീല്‍ഡ് മത്സരത്തില്‍ ജോഷ് മികച്ച ഫോമിലാണ്, അദ്ദേഹത്തിന്റെ ആദ്യ ടെസ്റ്റ് ടീമില്‍ ഇടം നേടാന്‍ അര്‍ഹനാണ്' ഓസ്ട്രേലിയയുടെ ദേശീയ സെലക്ടര്‍ ജോര്‍ജ്ജ് ബെയ്ലി പറഞ്ഞു.
രണ്ട് പുതുമുഖങ്ങള്‍ക്ക് പുറമേ, സ്പീഡ്സ്റ്റാര്‍ സ്‌കോട്ട് ബോളണ്ടിനെയും ഓസ്ട്രേലിയ ടീമില്‍ ഉള്‍പ്പെടുത്തിയിട്ടുണ്ട്. ക്യാപ്റ്റന്‍ പാറ്റ് കമ്മിന്‍സ്, മിച്ചല്‍ സ്റ്റാര്‍ക്ക്, ജോഷ് ഹേസല്‍വുഡ് എന്നിവര്‍ക്ക് പിന്തുണ നല്‍കുന്നതിനായി റിസര്‍വ് പേസറായാണ് അദ്ദേഹത്തെ നിയമിച്ചിരിക്കുന്നത്.
29 കാരനായ ജോഷ് ഇംഗ്ലിസിന്റെ ടീമിലെത്തുന്നത് കൗതുകകരമാണ്. നിലവിലെ ഷെഫീല്‍ഡ് ഷീല്‍ഡ് സീസണിലെ മികച്ച പ്രകടനത്തിനുള്ള പ്രതിഫലമായാണ് ഇംഗ്ലിസിനെ ടീമിലേക്ക് തിരഞ്ഞെടുത്തത്. പെര്‍ത്തില്‍ തുടര്‍ച്ചയായി സെഞ്ച്വറികള്‍ നേടിയതോടെയാണ് വെസ്റ്റ് ഓസ്ട്രേലിയന് വിക്കറ്റ് കീപ്പര്‍-ബാറ്റര്‍ ദേശീയ ടീമിലേക്ക് തിരഞ്ഞെടുക്കപ്പെടാന്‍ അര്‍ഹനാണെന്ന് തെളിയിച്ചത്.
ക്വീന്‍സ്ലാന്‍ഡിനെതിരെ 122 ഉം 48 ഉം റണ്‍സ് നേടിയ ഇംഗ്ലിസ് തുടര്‍ന്ന് ടാസ്മാനിയയ്ക്കെതിരെ 101 ഉം പുറത്താകാതെ 26 ഉം റണ്‍സ് നേടി. സ്ഥിരതയാര്‍ന്ന പ്രകടനങ്ങള്‍ ഉയര്‍ന്ന നിലവാരത്തിലേക്കുള്ള അദ്ദേഹത്തിന്റെ സന്നദ്ധത പ്രകടമാക്കുകയും വിശ്വസനീയനായ ഒരു മധ്യനിര ബാറ്റര്‍ എന്ന നിലയില്‍ അദ്ദേഹത്തിന്റെ ഖ്യാതി ഉറപ്പിക്കുകയും ചെയ്തു.
പെര്‍ത്ത് ടെസ്റ്റിനുള്ള ഓസ്ട്രേലിയയുടെ ടീം: പാറ്റ് കമ്മിന്‍സ് (ക്യാപ്റ്റന്‍), സ്‌കോട്ട് ബോളണ്ട്, അലക്‌സ് കാരി, ജോഷ് ഹേസല്‍വുഡ്, ട്രാവിസ് ഹെഡ്, ജോഷ് ഇംഗ്ലിസ്, ഉസ്മാന്‍ ഖവാജ, മാര്‍നസ് ലബുഷെയ്ന്‍, നഥാന്‍ ലിയോണ്‍, മിച്ചല്‍ മാര്‍ഷ്, നഥാന്‍ മക്‌സ്വീനി, സ്റ്റീവ് സ്മിത്ത്, മിച്ചല്‍ സ്റ്റാര്‍ക്ക്.
