ഡല്‍ഹിയ്ക്ക് കനത്ത തിരിച്ചടി, പ്രധാന താരങ്ങളൊന്നും കളിക്കില്ല
ഐപിഎല്‍ 2025 സീസണ്‍ പുനരാരംഭിക്കാനിരിക്കെ, ഡല്‍ഹി ക്യാപിറ്റല്‍സ് ടീമിന് വലിയ തിരിച്ചടികള്‍ നേരിടേണ്ടി വരുന്നു. ടീമിലെ പ്രധാന വിദേശ താരങ്ങളായ ഫാഫ് ഡു പ്ലെസിസ്, മിച്ചല്‍ സ്റ്റാര്‍ക്ക്, ജേക്ക് ഫ്രേസര്‍-മക്ഗര്‍ക്ക്, ഡൊണോവന്‍ ഫെരേര എന്നിവര്‍ ടൂര്‍ണമെന്റിന്റെ ശേഷിക്കുന്ന മത്സരങ്ങളില്‍ കളിക്കില്ലെന്ന് അറിയിച്ചിരിക്കുന്നത് ഡല്‍ഹിക്ക് കനത്ത ആഘാതമാണ്.
പ്രധാന ഓപ്പണര്‍മാരില്ലാതെ ഡല്‍ഹി
ടീമിന് ഏറ്റവും വലിയ തിരിച്ചടിയായിരിക്കുന്നത് ഓപ്പണര്‍മാരായ ഫാഫ് ഡു പ്ലെസിസിന്റെയും ജേക്ക് ഫ്രേസര്‍-മക്ഗര്‍ക്കിന്റെയും അഭാവമാണ്. ഡു പ്ലെസിസ് ഈ സീസണില്‍ ആറ് മത്സരങ്ങളില്‍ നിന്ന് 168 റണ്‍സ് നേടിയിരുന്നു. ഫ്രേസര്‍-മക്ഗര്‍ക്ക് ആകട്ടെ, ടൂര്‍ണമെന്റിന്റെ തുടക്കത്തില്‍ മികച്ച ഫോമിലായിരുന്നു. ഇരുവരും മടങ്ങിയതോടെ ഡല്‍ഹിക്ക് പുതിയ ഓപ്പണിംഗ് കൂട്ടുകെട്ടിനെ കണ്ടെത്തേണ്ടി വരും. കെ എല്‍ രാഹുല്‍, കരുണ്‍ നായര്‍, അഭിഷേക് പോറല്‍ എന്നിവരെ ഈ സ്ഥാനത്തേക്ക് പരിഗണിക്കാവുന്നതാണ്.
ബൗളിംഗ് നിരയിലും പ്രശ്‌നങ്ങള്‍
ഓസ്‌ട്രേലിയന്‍ പേസ് ബൗളര്‍ മിച്ചല്‍ സ്റ്റാര്‍ക്ക് ടൂര്‍ണമെന്റിന്റെ ശേഷിക്കുന്ന മത്സരങ്ങളില്‍ കളിക്കില്ലെന്ന് അറിയിച്ചത് ഡല്‍ഹിയുടെ ബൗളിംഗ് നിരയ്ക്കും വലിയ തിരിച്ചടിയാണ്. സ്റ്റാര്‍ക്ക് 11 മത്സരങ്ങളില്‍ നിന്ന് 14 വിക്കറ്റുകള്‍ നേടി ടീമിന്റെ പ്രധാന പേസ് ആക്രമണമായിരുന്നു നയിച്ചിരുന്നത്.
മറ്റ് വിദേശ താരങ്ങളുടെ ലഭ്യതയും അവ്യക്തതയില്‍
ഇംഗ്ലണ്ടിന്റെ ഹാരി ബ്രൂക്കിന് പകരമെത്തിയ അഫ്ഗാനിസ്ഥാന്‍ താരം സെദിഖുള്ള അടല്‍, ദക്ഷിണാഫ്രിക്കയുടെ ട്രിസ്റ്റന്‍ സ്റ്റബ്‌സ് (ലീഗ് ഘട്ടം വരെ മാത്രം), ശ്രീലങ്കയുടെ ദുഷ്മന്ത ചമീര എന്നിവരാണ് നിലവില്‍ ഡല്‍ഹി നിരയിലെ മറ്റ് വിദേശ താരങ്ങള്‍. ഫ്രേസര്‍-മക്ഗര്‍ക്കിന് പകരമായി ടീമിലെടുത്ത ബംഗ്ലാദേശ് പേസര്‍ മുസ്തഫിസുര്‍ റഹ്മാന്റെ ലഭ്യതയും ഇപ്പോഴും ഉറപ്പില്ലാത്ത അവസ്ഥയാണ്. ബംഗ്ലാദേശ് ക്രിക്കറ്റ് ബോര്‍ഡ് ഇതുവരെ താരത്തിന് എന്‍ഒസി നല്‍കിയിട്ടില്ലെന്നാണ് റിപ്പോര്‍ട്ടുകള്‍.
പ്ലേ ഓഫ് സാധ്യതകള്‍ക്ക് മങ്ങലേല്‍ക്കുന്നു
11 മത്സരങ്ങളില്‍ നിന്ന് 13 പോയിന്റുമായി പോയിന്റ് പട്ടികയില്‍ അഞ്ചാം സ്ഥാനത്താണ് ഡല്‍ഹി ക്യാപിറ്റല്‍സ്. പ്ലേ ഓഫില്‍ എത്താന്‍ ശേഷിക്കുന്ന മൂന്ന് മത്സരങ്ങളിലും ടീമിന് വിജയം അനിവാര്യമാണ്. എന്നാല്‍ പ്രധാന താരങ്ങളുടെ അഭാവം ടീമിന്റെ സാധ്യതകളെ കാര്യമായി ബാധിക്കും.
