ദക്ഷിണാഫ്രിക്കന്‍ ടീമില്‍ നിന്നും വിരമിക്കല്‍, ഞെട്ടിക്കുന്ന വെളിപ്പെടുത്തലുമായി ക്ലാസന്
അന്താരാഷ്ട്ര ക്രിക്കറ്റ് ലോകത്തെ ഞെട്ടിച്ചുകൊണ്ട് ടെസ്റ്റ് ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചതിന് പിന്നാലെ, കൂടുതല്‍ ഗൗരവമേറിയ വെളിപ്പെടുത്തലുകളുമായി ദക്ഷിണാഫ്രിക്കന്‍ വിക്കറ്റ് കീപ്പര്‍ ബാറ്റര്‍ ഹെയ്ന്റിച്ച് ക്ലാസന്. താന്‍ ദക്ഷിണാഫ്രിക്കന്‍ ടീമിനായി കളിച്ചിരുന്ന സമയത്ത് ടീം ജയിക്കുന്നുണ്ടോ തോല്‍ക്കുന്നുണ്ടോ എന്നതിനെക്കുറിച്ച് തനിക്ക് യാതൊരു ആശങ്കയുമില്ലായിരുന്നു എന്നാണ് ക്ലാസന് തുറന്നുപറഞ്ഞിരിക്കുന്നത്.
മോശം മാനസികാവസ്ഥയിലൂടെയാണ് താന്‍ കടന്നുപോയിരുന്നതെന്നും, രാജ്യത്തിനായി കളിക്കുന്നത് താന്‍ ആസ്വദിച്ചിരുന്നില്ലെന്നും ക്ലാസന് കൂട്ടിച്ചേര്‍ത്തു.
മാനസികമായി തകര്‍ന്നിരുന്നു
വിരമിക്കല്‍ തീരുമാനത്തിലേക്ക് നയിച്ച കാരണങ്ങളെക്കുറിച്ച് ഒരു മാധ്യമത്തിന് നല്‍കിയ അഭിമുഖത്തിലാണ് ക്ലാസന് ഞെട്ടിക്കുന്ന വെളിപ്പെടുത്തലുകള്‍ നടത്തിയത്.
'വളരെക്കാലമായി എന്റെ പ്രകടനങ്ങളെക്കുറിച്ചോ ടീം ജയിക്കുന്നുണ്ടോ എന്നതിനെക്കുറിച്ചോ ഞാന്‍ ശ്രദ്ധിച്ചിരുന്നില്ലെന്ന് എനിക്ക് തോന്നി. ഒരു കളിക്കാരന്‍ എത്തിച്ചേരാന്‍ പാടില്ലാത്ത ഒരവസ്ഥയാണത്. അടുത്തിടെ സമാപിച്ച ചാമ്പ്യന്‍സ് ട്രോഫിക്ക് മുമ്പ് ഞാന്‍ പരിശീലകനായിരുന്ന റോബ് വാള്‍ട്ടറുമായി ദീര്‍ഘനേരം സംസാരിച്ചിരുന്നു. എന്റെ ഉള്ളില്‍ നടക്കുന്ന കാര്യങ്ങളെക്കുറിച്ച് എനിക്ക് നല്ലതൊന്നും തോന്നുന്നില്ലെന്നും, കളി അത്രയധികം ആസ്വദിക്കുന്നില്ലെന്നും ഞാന്‍ അദ്ദേഹത്തോട് പറഞ്ഞു' ക്ലാസന് വ്യക്തമാക്കി.
ഈ വര്‍ഷം നടന്ന ഐസിസി ചാമ്പ്യന്‍സ് ട്രോഫിയില്‍ ദക്ഷിണാഫ്രിക്കന്‍ ടീമിന്റെ ഭാഗമായിരുന്നെങ്കിലും, ക്രിക്കറ്റ് സൗത്ത് ആഫ്രിക്കയുടെ (CSA) സെന്‍ട്രല്‍ കോണ്‍ട്രാക്റ്റില്‍ നിന്ന് ക്ലാസനെ ഒഴിവാക്കിയിരുന്നു. ഇതും താരത്തിന്റെ തീരുമാനങ്ങള്‍ക്ക് ആക്കം കൂട്ടി.
പരിശീലകന്റെ മാറ്റവും കരാര്‍ തര്‍ക്കങ്ങളും
2027ലെ ഏകദിന ലോകകപ്പ് വരെ ദക്ഷിണാഫ്രിക്കന്‍ ടീമിനായി കളിക്കാനായിരുന്നു താന്‍ മനസ്സില്‍ പദ്ധതിയിട്ടിരുന്നതെന്നും ക്ലാസന് പറയുന്നു. '2027 ലോകകപ്പ് വരെ ഞങ്ങള്‍ എല്ലാ കാര്യങ്ങളും ഭംഗിയായി ആസൂത്രണം ചെയ്തിരുന്നു. എന്നാല്‍ പരിശീലകന്‍ റോബ് വാള്‍ട്ടര്‍ സ്ഥാനമൊഴിഞ്ഞതും, ക്രിക്കറ്റ് സൗത്ത് ആഫ്രിക്കയുമായുള്ള കരാര്‍ ചര്‍ച്ചകള്‍ വിചാരിച്ച രീതിയില്‍ മുന്നോട്ട് പോകാതിരുന്നതും എന്റെ വിരമിക്കല്‍ തീരുമാനം വളരെ എളുപ്പമാക്കി' ക്ലാസന് കൂട്ടിച്ചേര്‍ത്തു.
മേജര്‍ ലീഗ് ക്രിക്കറ്റ് (MLC), ദി ഹന്‍ഡ്രഡ് തുടങ്ങിയ ഫ്രാഞ്ചൈസി ലീഗുകളില്‍ കളിക്കാനുള്ള ക്ലാസന്റെ താല്പര്യം ദേശീയ ടീമിന്റെ മത്സരക്രമവുമായി ഒത്തുപോകാത്തതാണ് സിഎസ്എയുമായുള്ള കരാര്‍ ചര്‍ച്ചകള്‍ പരാജയപ്പെടാന്‍ പ്രധാന കാരണം. സിംബാബ്വെ-ന്യൂസിലന്‍ഡ് ത്രിരാഷ്ട്ര പരമ്പര, ഓസ്‌ട്രേലിയന്‍ പര്യടനം എന്നിവയില്‍ നിന്ന് ക്ലാസന് വിട്ടുനില്‍ക്കേണ്ടി വരുമായിരുന്നു. ഇതോടെയാണ് കരാര്‍ നല്‍കാതിരിക്കാന്‍ ബോര്‍ഡ് തീരുമാനിച്ചത്.
കുടുംബത്തിന് വേണ്ടിയുള്ള തീരുമാനം
തുടര്‍ച്ചയായ യാത്രകളും മത്സരങ്ങളും കാരണം കുടുംബത്തോടൊപ്പം സമയം ചെലവഴിക്കാന്‍ സാധിക്കുന്നില്ല എന്നതും വിരമിക്കല്‍ തീരുമാനത്തിന് പിന്നിലെ ഒരു പ്രധാന ഘടകമാണെന്ന് ക്ലാസന് സമ്മതിക്കുന്നു. രണ്ടര വയസ്സുള്ള ഒരു മകളുടെ പിതാവ് കൂടിയാണ് ക്ലാസന്. 'ഇനി എനിക്ക് വര്‍ഷത്തില്‍ ആറോ ഏഴോ മാസക്കാലം വീട്ടില്‍ ചെലവഴിക്കാന്‍ സാധിക്കും. എന്റെ കുടുംബത്തിന് അത് ആവശ്യമാണ്. കഴിഞ്ഞ നാല് വര്‍ഷം ഒരുപാട് യാത്രകളുടേതായിരുന്നു. എനിക്ക് അല്പം വിശ്രമം വേണം,' അദ്ദേഹം പറഞ്ഞു.
സ്പിന്നര്‍മാര്‍ക്കെതിരെ അനായാസം സിക്‌സറുകള്‍ നേടാനുള്ള കഴിവുകൊണ്ട് ലോകമെമ്പാടും ആരാധകരെ സൃഷ്ടിച്ച താരമാണ് ക്ലാസന്. അദ്ദേഹത്തിന്റെ 'വിപ്പ്-പുള്‍' ഷോട്ടുകള്‍ ഏറെ പ്രശസ്തമാണ്. 2023ലെ ഐസിസി ഏകദിന ലോകകപ്പ്, 2024ലെ ടി20 ലോകകപ്പ്, 2025ലെ ചാമ്പ്യന്‍സ് ട്രോഫി എന്നിവയിലെല്ലാം ദക്ഷിണാഫ്രിക്കന്‍ ടീമിലെ നിര്‍ണായക സാന്നിധ്യമായിരുന്നു ഈ വെടിക്കെട്ട് ബാറ്റര്‍. ക്ലാസന്റെ ഈ തുറന്നുപറച്ചില്‍ ക്രിക്കറ്റ് ലോകത്ത് വലിയ ചര്‍ച്ചകള്‍ക്കാണ് വഴിവെച്ചിരിക്കുന്നത്.