പരിക്കിനോട് പടവെട്ടി പൊരുതി, ബാവുമ എന്ന ഹീറോ
ലോക ടെസ്റ്റ് ചാമ്പ്യന്‍ഷിപ്പ് ഫൈനലിന്റെ മൂന്നാം ദിനം അവസാനിക്കുമ്പോള്‍ ദക്ഷിണാഫ്രിക്ക കിരീടം സ്വപ്‌നം കണ്ടാണ് ഉറങ്ങാന്‍ പോയിരിക്കുന്നത്. അവരുടെ ക്രിക്കറ്റിന്റെ തലവര മാറ്റിയെഴുതുന്ന ഒരു ചരിത്ര വിജയത്തിന് കേവലം 69 റണ്‍സ് മാത്രമാണ് ഇനി ദക്ഷിണാഫ്രിക്കയ്ക്ക് ജയിക്കാന്‍ വേണ്ടത്.
ഓസ്ട്രേലിയ ഉയര്‍ത്തിയ 282 റണ്‍സ് എന്ന കടുപ്പമേറിയ വിജയലക്ഷ്യം പിന്തുടരുന്ന പ്രോട്ടീസ്, ദിനം കളി നിര്‍ത്തുമ്പോള്‍ 2 വിക്കറ്റ് നഷ്ടത്തില്‍ 213 റണ്‍സ് എന്ന ശക്തമായ നിലയിലാണ്. പരിക്കിന്റെ വേദന കടിച്ചമര്‍ത്തി ക്രീസില്‍ നിലയുറപ്പിച്ച നായകന്‍ ടെംബ ബാവുമയുടെയും (65),?? കൂട്ടായി നിലയുറപ്പിച്ച എയ്ഡന്‍ മര്‍ക്രമിന്റെയും (103) അപരാജിതമായ കൂട്ടുകെട്ടാണ് ദക്ഷിണാഫ്രിക്കയ്ക്ക് വിജയപ്രതീക്ഷ നല്‍കുന്നത്.
ഓസ്ട്രേലിയന്‍ പ്രതീക്ഷകളും, വഴിമാറാത്ത ഭാഗ്യവും
മത്സരത്തിനിടെ, ഓസ്ട്രേലിയന്‍ ഫീല്‍ഡര്‍മാരുടെ നിരന്തരമായ അഭ്യര്‍ത്ഥനയെത്തുടര്‍ന്ന് അമ്പയര്‍മാര്‍ പന്ത് മാറ്റിയപ്പോള്‍ ഒരു നിമിഷം ദക്ഷിണാഫ്രിക്കന്‍ താരങ്ങളായ ബാവുമയും മര്‍ക്രമും കൗതുകത്തോടെ നോക്കിനിന്നു. പ്രതിരോധത്തിലായ ചാമ്പ്യന്മാര്‍ക്ക് ഒരുപക്ഷേ അതായിരുന്നു അവസാനത്തെ പ്രതീക്ഷയുടെ കിരണം. പലപ്പോഴും പന്ത് മാറുന്നത് കളിയുടെ ഗതി മാറ്റാറുണ്ട്, എന്നാല്‍ ഈ ദിവസം ഭാഗ്യം ദക്ഷിണാഫ്രിക്കയ്ക്കൊപ്പമായിരുന്നു. ബാവുമയും മര്‍ക്രമും വിക്കറ്റില്‍ ഉറച്ചുനിന്നതോടെ ഓസ്ട്രേലിയന്‍ പ്രതീക്ഷകള്‍ അസ്തമിച്ചു.
എങ്കിലും, വിജയം അത്രയെളുപ്പമാണെന്ന് ദക്ഷിണാഫ്രിക്കയ്ക്ക് കരുതാനാവില്ല. കൈയെത്തും ദൂരത്താണെങ്കിലും, ലക്ഷ്യം ഇപ്പോഴും അകലെയാണ്. ഏതു നിമിഷവും മത്സരം തട്ടിയെടുക്കാന്‍ കഴിവുള്ളവരാണ് ഓസ്ട്രേലിയക്കാര്‍. ഇരു ടീമുകളുടെയും ചരിത്രം പരിശോധിച്ചാല്‍, അമിതമായ ആത്മവിശ്വാസവും തിടുക്കത്തിലുള്ള ആഘോഷങ്ങളും അപകടം ചെയ്യുമെന്ന് വ്യക്തമാകും. നാലാം ദിനം കാലാവസ്ഥ മാറിമറിഞ്ഞാല്‍, ഓസ്ട്രേലിയയുടെ അപകടകാരികളായ പേസ് ത്രയത്തിന് അത് അനുകൂലമായേക്കാം. എന്നാല്‍ മൂന്നാം ദിനം തെളിഞ്ഞ കാലാവസ്ഥയില്‍, പിച്ചിന്റെ സ്വഭാവം മുതലെടുത്ത് ദക്ഷിണാഫ്രിക്ക അനായാസം ബാറ്റ് വീശി.
പരിക്കിനോട് പൊരുതിയ നായകന്റെ വീര്യം
ഈ മത്സരത്തില്‍ മര്‍ക്രം ടീമിന്റെ അച്ചുതണ്ടായപ്പോള്‍, ദക്ഷിണാഫ്രിക്കയുടെ പോരാട്ടവീര്യത്തിന്റെ പ്രതീകവും തുടിക്കുന്ന ഹൃദയവും നായകന്‍ ടെംബ ബാവുമയായിരുന്നു. ഇരുവരും ചേര്‍ന്ന് പടുത്തുയര്‍ത്തിയ 143 റണ്‍സിന്റെ അപരാജിത കൂട്ടുകെട്ട് ഒരുപക്ഷേ ദക്ഷിണാഫ്രിക്കന്‍ ക്രിക്കറ്റ് ചരിത്രത്തിലെ തന്നെ ഏറ്റവും വിലപ്പെട്ട ഒന്നായി മാറിയേക്കാം. 282 റണ്‍സ് എന്ന ലക്ഷ്യം ആദ്യ രണ്ട് ദിവസങ്ങളിലെ പിച്ചിന്റെ സ്വഭാവം വെച്ച് നോക്കുമ്പോള്‍ ഭയപ്പെടുത്തുന്നതായിരുന്നു. ഫൈനലിന്റെ സമ്മര്‍ദ്ദവും, മുന്‍കാലങ്ങളിലെ തോല്‍വികളുടെ ഭാരവും, ഓസ്ട്രേലിയയുടെ ശക്തമായ ബൗളിംഗ് നിരയും ഒരുമിച്ച് വെല്ലുവിളി ഉയര്‍ത്തിയപ്പോള്‍, ബാവുമയുടെ സംഘം ഒന്നിനെയും കൂസാതെ മുന്നേറി.
'വിജയലക്ഷ്യം പിന്തുടരാന്‍ തുടങ്ങിയപ്പോള്‍ പരാജയഭീതി ഞങ്ങളെ വിട്ടകന്നു,' മത്സരത്തില്‍ നിര്‍ണായകമായ 61 റണ്‍സിന്റെ കൂട്ടുകെട്ടുണ്ടാക്കിയ വിയാന്‍ മള്‍ഡര്‍ പറഞ്ഞു. ദക്ഷിണാഫ്രിക്കയുടെ പല തകര്‍ച്ചകള്‍ക്കും കാരണമായത് ഈ പരാജയഭീതിയായിരുന്നു. എന്നാല്‍ ഇത്തവണ അവര്‍ ചരിത്രം തിരുത്തിയെഴുതാന്‍ ഉറച്ചായിരുന്നു ക്രീസിലിറങ്ങിയത്. മിച്ചല്‍ സ്റ്റാര്‍ക്കിന്റെ തകര്‍പ്പന്‍ പന്തില്‍ റയാന്‍ റിക്കിള്‍ട്ടന്റെ വിക്കറ്റ് തുടക്കത്തിലെ നഷ്ടമായിട്ടും, ഓസ്ട്രേലിയന്‍ വാലറ്റം നിര്‍ണായകമായ 59 റണ്‍സ് കൂട്ടിച്ചേര്‍ത്ത് പഴയ പേടിസ്വപ്നങ്ങള്‍ ഓര്‍മ്മിപ്പിച്ചിട്ടും, ഈ ദക്ഷിണാഫ്രിക്കന്‍ സംഘം പതറിയില്ല.
ബാവുമ എന്ന പോരാളി
മര്‍ക്രമിന്റെ തകര്‍പ്പന്‍ ഷോട്ടുകള്‍ക്കും അചഞ്ചലമായ ആത്മവിശ്വാസത്തിനും എത്ര പ്രശംസ നല്‍കിയാലും, ബാവുമയുടെ 121 പന്തില്‍ നിന്നുള്ള 65 റണ്‍സ് അതിലേറെ വിലപ്പെട്ടതായിരുന്നു. 22-ാം ഓവറില്‍ ഫീല്‍ഡിങ്ങിനിടെ സംഭവിച്ച ഹാംസ്ട്രിങ് പരിക്ക് അദ്ദേഹത്തെ തളര്‍ത്തിയിരുന്നു. ഓടുമ്പോള്‍ വേദന കൊണ്ട് പുളഞ്ഞപ്പോഴും, അനായാസം നേടാമായിരുന്ന ഡബിളുകളും ട്രിപ്പിളുകളും വേണ്ടെന്നു വെച്ചപ്പോഴും, ഇടവേളകളില്‍ നിലത്ത് തളര്‍ന്നിരുന്നപ്പോഴും ബാവുമ ക്രീസില്‍ നിന്ന് മടങ്ങാന്‍ തയ്യാറായിരുന്നില്ല. തന്റെ ???? ഊര്‍ജ്ജവും അടുത്ത പന്തിനെ നേരിടാന്‍ വേണ്ടി അദ്ദേഹം സംഭരിച്ചുവെച്ചു.
പരിക്ക് അദ്ദേഹത്തിന്റെ ബാറ്റിങ്ങിനെ ഒരു തരത്തിലും ബാധിച്ചില്ല. 33-ാം ഓവറില്‍ പാറ്റ് കമ്മിന്‍സിനെതിരെ അടിച്ച മനോഹരമായ സ്‌ട്രെയിറ്റ് ഡ്രൈവ് ഉള്‍പ്പെടെ നിരവധി മികച്ച ഷോട്ടുകള്‍ അദ്ദേഹം കളിച്ചു. വെറും രണ്ട് റണ്‍സില്‍ നില്‍ക്കെ, സ്ലിപ്പില്‍ സ്റ്റീവ് സ്മിത്ത് കൈവിട്ട ഒരവസരം ഒഴിച്ചുനിര്‍ത്തിയാല്‍ അദ്ദേഹത്തിന്റെ ഇന്നിംഗ്‌സ് ???????ച്ചമായിരുന്നു. അനാവശ്യ ആക്രമണോത്സുകത കാണിക്കാതെ, എന്നാല്‍ പ്രതിരോധത്തിലേക്ക് പൂര്‍ണ്ണമായി ഉള്‍വലിയാതെ അദ്ദേഹം സമചിത്തതയോടെ ബാറ്റുചെയ്തു.
ബാവുമയും മര്‍ക്രവും ചേര്‍ന്ന് പിച്ചിനെ മത്സരത്തില്‍ നിന്ന് അപ്രസക്തമാക്കി. കത്തുന്ന വെയിലേറ്റതോടെ പിച്ചിലെ ഈര്‍പ്പം നഷ്ടപ്പെടുകയും ബാറ്റിംഗിന് അനുകൂലമാവുകയും ചെയ്തു. എങ്കിലും ചില പന്തുകള്‍ അപ്രതീക്ഷിതമായി നിന്നുപോവുകയോ, കുതിച്ചുയരുകയോ ചെയ്തിരുന്നു. എന്നാല്‍ എല്ലാ പ്രതികൂല ചിന്തകളെയും മനസ്സില്‍ നിന്ന് അകറ്റി, വിജയം എന്ന ഒരൊറ്റ ലക്ഷ്യത്തില്‍ മാത്രം ശ്രദ്ധ കേന്ദ്രീകരിച്ച് അവര്‍ മുന്നേറി. ഇനി ഒരു ദിവസം കൂടി പിടിച്ചുനിന്നാല്‍, ടെസ്റ്റ് ക്രിക്കറ്റിലെ ലോകകിരീടം ദക്ഷിണാഫ്രിക്കയ്ക്ക് സ്വന്തമാക്കാം.
