ഐപിഎല്‍ ഫളോപ്പ് ഇലവന്‍: ക്യാപ്റ്റന്‍ പന്ത്, ധോണിയും ടീമില്‍

ഇന്ത്യന്‍ പ്രീമിയര്‍ ലീഗിന്റെ (ഐപിഎല്‍) 2025 പതിപ്പിന് തിരശ്ശീല വീണപ്പോള്‍, 18 വര്‍ഷത്തെ കാത്തിരിപ്പിനൊടുവില്‍ റോയല്‍ ചലഞ്ചേഴ്സ് ബെംഗളൂരു (ആര്‍സിബി) കന്നിക്കിരീടത്തില്‍ മുത്തമിട്ടത് ആരാധകര്‍ക്ക് ആവേശമായി. സായ് സുദര്‍ശന്‍ (ഓറഞ്ച് ക്യാപ്), പ്രസിദ്ധ് കൃഷ്ണ (പര്‍പ്പിള്‍ ക്യാപ്) തുടങ്ങിയ നിരവധി കളിക്കാര്‍ ടൂര്‍ണമെന്റില്‍ മികച്ച പ്രകടനം കാഴ്ചവെച്ചപ്പോള്‍, പ്രതീക്ഷയ്ക്കൊത്ത് ഉയരാനാകാതെ നിരാശപ്പെടുത്തിയ ഒരുപിടി താരങ്ങളും ഈ സീസണിലുണ്ടായിരുന്നു. കോടികള്‍ മുടക്കി ടീമിലെത്തിച്ചിട്ടും നിരാശാജനകമായ പ്രകടനം കാഴ്ചവെച്ചവരാണ് ഇവരില്‍ ഭൂരിഭാഗവും.

ഋഷഭ് പന്ത് മുതല്‍ രവിചന്ദ്രന്‍ അശ്വിന്‍ വരെ ഉള്‍പ്പെടുന്ന ഐപിഎല്‍ 2025ലെ ഫ്‌ലോപ്പ് ഇലവന്‍ പരിശോധിക്കാം:

ഓപ്പണര്‍മാര്‍

• രചിന്‍ രവീന്ദ്ര (ചെന്നൈ സൂപ്പര്‍ കിംഗ്‌സ്): ന്യൂസിലന്‍ഡിന്റെ ഈ യുവതാരത്തെ 4 കോടി രൂപയ്ക്കാണ് ചെന്നൈ സൂപ്പര്‍ കിംഗ്‌സ് ടീമിലെത്തിച്ചത്. സിഎസ്‌കെയുടെ ഓപ്പണിംഗ് പ്രതീക്ഷയായിരുന്ന രവീന്ദ്രയ്ക്ക് 8 മത്സരങ്ങളില്‍ നിന്ന് വെറും 191 റണ്‍സ് നേടാനെ കഴിഞ്ഞുള്ളൂ. പ്രതീക്ഷിച്ച ഓപ്പണിംഗ് മികവ് നല്‍കാന്‍ താരത്തിനായില്ല.
• ഇഷാന്‍ കിഷന്‍ (സണ്‍റൈസേഴ്‌സ് ഹൈദരാബാദ്): സണ്‍റൈസേഴ്‌സ് ഹൈദരാബാദിന് വേണ്ടി ഈ സീസണില്‍ ഒരു സെഞ്ച്വറിയോടെ മികച്ച തുടക്കമാണ് ഇഷാന്‍ കിഷന് ലഭിച്ചത്. എന്നാല്‍ പിന്നീടുള്ള മത്സരങ്ങളില്‍ ഈ ഫോം നിലനിര്‍ത്താന്‍ താരത്തിനായില്ല. ടൂര്‍ണമെന്റില്‍ ആകെ 196 റണ്‍സാണ് താരത്തിന്റെ സമ്പാദ്യം.

മധ്യനിര

• ഋഷഭ് പന്ത് (ക്യാപ്റ്റന്‍) (ലഖ്‌നൗ സൂപ്പര്‍ ജയന്റ്‌സ്): ഐപിഎല്‍ ചരിത്രത്തിലെ ഏറ്റവും വിലയേറിയ താരമെന്ന ഖ്യാതിയോടെയാണ് ഋഷഭ് പന്ത് ലഖ്‌നൗ സൂപ്പര്‍ ജയന്റ്‌സിലെത്തിയത്. 27 കോടി രൂപ മുടക്കിയാണ് ലഖ്‌നൗ പന്തിനെ സ്വന്തമാക്കിയത്. എന്നാല്‍ 13 കളികളില്‍ നിന്ന് വെറും 269 റണ്‍സ് മാത്രമാണ് താരത്തിന് നേടാനായത്. മിക്ക മത്സരങ്ങളിലും ഒറ്റ അക്ക സ്‌കോറുകളില്‍ പുറത്തായതും തിരിച്ചടിയായി. ഈ ഫ്‌ലോപ്പ് ഇലവന്റെ നായകനും പന്താണ്.
• വെങ്കടേഷ് അയ്യര്‍ (കൊല്‍ക്കത്ത നൈറ്റ് റൈഡേഴ്‌സ്): 23.75 കോടി രൂപയെന്ന വമ്പന്‍ തുകയ്ക്ക് കൊല്‍ക്കത്ത നൈറ്റ് റൈഡേഴ്‌സ് നിലനിര്‍ത്തിയ വെങ്കടേഷ് അയ്യര്‍ക്ക് സീസണില്‍ തിളങ്ങാനായില്ല. 142 റണ്‍സ് മാത്രമാണ് താരത്തിന് നേടാനായത്. മോശം ഫോമിനെ തുടര്‍ന്ന് അവസാന ചില മത്സരങ്ങളില്‍ താരത്തെ ടീമില്‍ നിന്ന് ഒഴിവാക്കുകയും ചെയ്തിരുന്നു.
• ഗ്ലെന്‍ മാക്സ്വെല്‍ (പഞ്ചാബ് കിംഗ്‌സ്): ഫൈനലിലെത്തിയ പഞ്ചാബ് കിംഗ്‌സിന് മികച്ച സീസണായിരുന്നു ഇത്. എന്നാല്‍ ഓസീസ് താരം ഗ്ലെന്‍ മാക്സ്വെല്‍ ടീമിന് ബാധ്യതയായി. 6 കളികളില്‍ നിന്ന് വെറും 48 റണ്‍സും 4 വിക്കറ്റും മാത്രമാണ് താരത്തിന്റെ സംഭാവന. പ്രതീക്ഷിച്ച ഓള്‍റൗണ്ട് പ്രകടനം താരത്തില്‍ നിന്നുണ്ടായില്ല.
• നിതീഷ് കുമാര്‍ റെഡ്ഡി (സണ്‍റൈസേഴ്‌സ് ഹൈദരാബാദ്): ഐപിഎല്‍ 2024ലെ എമര്‍ജിംഗ് പ്ലെയര്‍ പുരസ്‌കാര ജേതാവായ നിതീഷ് കുമാര്‍ റെഡ്ഡിയെ സണ്‍റൈസേഴ്‌സ് ഹൈദരാബാദ് നിലനിര്‍ത്തുകയായിരുന്നു. എന്നാല്‍ ഈ സീസണില്‍ 182 റണ്‍സും 2 വിക്കറ്റും മാത്രമാണ് താരത്തിന് നേടാനായത്. കഴിഞ്ഞ സീസണിലെ മികവ് ആവര്‍ത്തിക്കാന്‍ താരത്തിനായില്ല.

വിക്കറ്റ് കീപ്പര്‍

• എംഎസ് ധോണി (ചെന്നൈ സൂപ്പര്‍ കിംഗ്‌സ്): ചെന്നൈ സൂപ്പര്‍ കിംഗ്‌സിന്റെ ഇതിഹാസതാരം എംഎസ് ധോണിക്ക് ഒരുപക്ഷേ കരിയറിലെ ഏറ്റവും മോശം സീസണുകളില്‍ ഒന്നായിരിക്കും ഇത്. 14 കളികളില്‍ നിന്ന് 135 എന്ന കുറഞ്ഞ സ്ട്രൈക്ക് റേറ്റില്‍ വെറും 196 റണ്‍സ് മാത്രമാണ് ധോണിക്ക് നേടാനായത്. ഫിനിഷര്‍ റോളില്‍ തിളങ്ങാന്‍ അദ്ദേഹത്തിനായില്ല.

ബൗളര്‍മാര്‍

• റാഷിദ് ഖാന്‍ (ഗുജറാത്ത് ടൈറ്റന്‍സ്): അഫ്ഗാന്‍ സ്പിന്‍ ഇതിഹാസം റാഷിദ് ഖാന് ഗുജറാത്ത് ടൈറ്റന്‍സിനായി ഐപിഎല്‍ കരിയറിലെ ഏറ്റവും മോശം സീസണാണ് ലഭിച്ചത്. 57ന് മുകളില്‍ ശരാശരിയില്‍ വെറും 9 വിക്കറ്റുകള്‍ മാത്രമാണ് താരത്തിന് നേടാനായത്. നിര്‍ണായക ഘട്ടങ്ങളില്‍ വിക്കറ്റ് വീഴ്ത്തുന്നതില്‍ താരം പരാജയപ്പെട്ടു.
• രവിചന്ദ്രന്‍ അശ്വിന്‍ (ചെന്നൈ സൂപ്പര്‍ കിംഗ്‌സ്): 9.75 കോടി രൂപയ്ക്ക് ചെന്നൈ സൂപ്പര്‍ കിംഗ്‌സിലേക്കുള്ള തിരിച്ചുവരവ് അശ്വിനെ സംബന്ധിച്ചിടത്തോളം അത്ര ശുഭകരമായിരുന്നില്ല. 9 കളികളില്‍ നിന്ന് വെറും 7 വിക്കറ്റുകള്‍ മാത്രമാണ് താരത്തിന് നേടാനായത്. അനുഭവസമ്പന്നനായ ഒരു സ്പിന്നറില്‍ നിന്ന് ടീം പ്രതീക്ഷിച്ച പ്രകടനം ഇതല്ലായിരുന്നു.
• ദീപക് ചഹാര്‍ (മുംബൈ ഇന്ത്യന്‍സ്): മുംബൈ ഇന്ത്യന്‍സിന്റെ ബൗളിംഗ് നിരയിലെ ഒരുപക്ഷേ ഏറ്റവും ദുര്‍ബലമായ കണ്ണി ദീപക് ചഹാര്‍ ആയിരുന്നു. 14 കളികളില്‍ നിന്ന് 11 വിക്കറ്റുകള്‍ മാത്രമാണ് താരത്തിന് നേടാനായത്. പവര്‍പ്ലേയില്‍ വിക്കറ്റുകള്‍ നേടാനുള്ള മികവ് ഈ സീസണില്‍ താരത്തിന് നഷ്ടമായി.
• മുഹമ്മദ് ഷമി (സണ്‍റൈസേഴ്‌സ് ഹൈദരാബാദ്): പരിക്കിനെ തുടര്‍ന്ന് കഴിഞ്ഞ സീസണ്‍ നഷ്ടമായ ശേഷം ഐപിഎല്ലിലേക്ക് മടങ്ങിയെത്തിയ മുഹമ്മദ് ഷമിക്ക് ഇത് മറക്കാനാഗ്രഹിക്കുന്ന സീസണായിരിക്കും. 10 കോടി രൂപയ്ക്ക് സണ്‍റൈസേഴ്‌സ് ഹൈദരാബാദ് സ്വന്തമാക്കിയ ഷമിക്ക് 9 കളികളില്‍ നിന്ന് 11ന് മുകളില്‍ ഇക്കോണമിയില്‍ വെറും 6 വിക്കറ്റുകള്‍ മാത്രമാണ് നേടാനായത്.