ബ്രൂക്കിന് രണ്ട് വര്‍ഷത്തെ വിലക്ക്, ഇംഗ്ലീഷ് താരത്തിനെതിരെ ആഞ്ഞടിച്ച് മൈക്കിള്‍ ക്ലാര്‍ക്ക്
ഇംഗ്ലണ്ട് ബാറ്റര്‍ ഹാരി ബ്രൂക്കിനെ രണ്ട് വര്‍ഷത്തേക്ക് ഇന്ത്യന്‍ പ്രീമിയര്‍ ലീഗില്‍ (ഐപിഎല്‍) നിന്ന് വിലക്കിയ ബിസിസിഐയുടെ തീരുമാനത്തെ പിന്തുണച്ച് മുന്‍ ഓസ്ട്രേലിയന്‍ ക്യാപ്റ്റന്‍ മൈക്കിള്‍ ക്ലാര്‍ക്ക് രംഗത്ത്. ഡല്‍ഹി ക്യാപിറ്റല്‍സ് 6.25 കോടി രൂപയ്ക്ക് ലേലത്തില്‍ വാങ്ങിയതിന് ശേഷം മത്സരിക്കാനില്ലെന്ന് ഹാരി ബ്രൂക്ക് അറിയിച്ചതിനെ തുടര്‍ന്നാണ് ബിസിസിഐയുടെ നടപടി. ബിസിസിഐ നിയമങ്ങള്‍ അനുസരിച്ച്, ലേലത്തില്‍ വാങ്ങിയ ശേഷം പിന്മാറാന്‍ തീരുമാനിച്ചാല്‍ രണ്ട് വര്‍ഷത്തേക്ക് വിലക്ക് ലഭിക്കും.
ഈ വിഷയത്തില്‍ ബിസിസിഐയുടെ നിലപാടിനെ പൂര്‍ണ്ണമായും പിന്തുണയ്ക്കുന്നുവെന്നും ഭാവിയില്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ ഈ നടപടി ഒരു മുന്‍കരുതലായിരിക്കുമെന്നും ക്ലാര്‍ക്ക് പറഞ്ഞു. ലേലത്തില്‍ പ്രതീക്ഷിച്ച തുക ലഭിച്ചില്ല എന്ന കാരണത്താല്‍ കളിക്കാര്‍ പിന്മാറുന്നത് അംഗീകരിക്കാനാവില്ലെന്നും അടിയന്തര സാഹചര്യങ്ങളില്‍ മാത്രമേ പിന്മാറാന്‍ അനുവദിക്കാവൂ എന്നും അദ്ദേഹം കൂട്ടിച്ചേര്‍ത്തു.
ക്ലാര്‍ക്കിന്റെ വാക്കുകള്‍
'ഹാരി ബ്രൂക്കിനെ എത്ര രൂപയ്ക്കാണ് ലേലത്തില്‍ വാങ്ങിയത്? ഇസിബിയുമായി പൂര്‍ണ്ണ കരാറുള്ള അദ്ദേഹത്തിന് ഇപ്പോള്‍ വിലക്ക് ലഭിച്ചെന്ന് കരുതുക. ഇതാണ് സംഭവിക്കുക. നിരവധി കളിക്കാര്‍ ലേലത്തില്‍ പങ്കെടുക്കുന്നു, അവര്‍ ആഗ്രഹിക്കുന്ന തുക ലഭിക്കാത്തതിനാല്‍ പിന്മാറുന്നു. പിന്മാറിയാല്‍ രണ്ട് വര്‍ഷത്തെ വിലക്ക് ലഭിക്കുമെന്ന് ഐപിഎല്‍ പറയുന്നു,' ബിയോണ്ട് 23 ക്രിക്കറ്റ് പോഡ്കാസ്റ്റില്‍ ക്ലാര്‍ക്ക് പറഞ്ഞു.
'ഹാരി ബ്രൂക്കാണ് ഇങ്ങനെ ചെയ്ത ആദ്യ കളിക്കാരനെന്ന് തോന്നുന്നു, എന്നാല്‍ ഐപിഎല്‍ ഇങ്ങനെ ചെയ്യുന്നത് എന്തിനാണെന്ന് എനിക്ക് മനസ്സിലാകും. ഓരോ കളിക്കാരനും കൂടുതല്‍ പണം ആഗ്രഹിക്കുന്നു, എന്നാല്‍ ലേലത്തില്‍ പങ്കെടുത്ത് വാങ്ങിക്കഴിഞ്ഞാല്‍ അത് അംഗീകരിക്കുകയും നിങ്ങള്‍ക്ക് ഇഷ്ടമുള്ള തുക ലഭിക്കാത്തതിനാല്‍ പിന്മാറാന്‍ കഴിയില്ലെന്ന് മനസ്സിലാക്കുകയും വേണം' ക്ലാര്‍ക്ക് ഓര്‍മ്മിപ്പിക്കുന്നു.
ബ്രൂക്ക് മികച്ച കളിക്കാരനാണെന്നും ഭാവിയില്‍ അദ്ദേഹം തീര്‍ച്ചയായും ഐപിഎല്ലിന്റെ ഭാഗമാകുമെന്നും എന്നാല്‍ ശരിയായ കാരണമില്ലാതെ ഒരു കളിക്കാരനും മത്സരത്തില്‍ നിന്ന് പിന്മാറാന്‍ കഴിയില്ലെന്നും ക്ലാര്‍ക്ക് പറഞ്ഞു.
'അദ്ദേഹം മികച്ച കളിക്കാരനാണ്, അദ്ദേഹം ആഗ്രഹിക്കുന്നുവെങ്കില്‍ ഭാവിയില്‍ ഐപിഎല്ലിന്റെ ഭാഗമാകുമെന്നതില്‍ എനിക്ക് സംശയമില്ല. എന്നാല്‍ അദ്ദേഹത്തിന് അതിന്റേതായ കാരണങ്ങളുണ്ടാകാം. ഓരോ വ്യക്തിക്കും ഈ തിരഞ്ഞെടുപ്പ് നടത്താനുള്ള അവകാശമുണ്ട് - ഐപിഎല്‍ അല്ലെങ്കില്‍ ആഭ്യന്തര മത്സരം. നിങ്ങള്‍ക്ക് തിരഞ്ഞെടുക്കാം'
'എന്റെ കുടുംബത്തിലെ ഒരാള്‍ മരിച്ചതിനാല്‍ ഞാന്‍ പിന്മാറിയത് ആദ്യ വര്‍ഷമോ രണ്ടാം വര്‍ഷമോ ആണെന്ന് ഓര്‍ക്കുന്നില്ല. കുടുംബത്തിനും ശവസംസ്‌കാരത്തിനും ഒപ്പം ഉണ്ടാകാനാണ് ഞാന്‍ വീട്ടിലേക്ക് വന്നത്. അതിനാല്‍ വ്യക്തിപരമായ കാരണങ്ങളുണ്ടെങ്കില്‍ ഐപിഎല്‍ അത് മനസ്സിലാക്കുകയും ബഹുമാനിക്കുകയും ചെയ്യുമെന്ന് ഞാന്‍ കരുതുന്നു, എന്നാല്‍ നിങ്ങള്‍ക്ക് ആവശ്യമുള്ള പണം ലഭിക്കാത്തതിനാലാണ് പിന്മാറുന്നതെങ്കില്‍ അവര്‍ കര്‍ശന നടപടിയെടുക്കും. അത് ബഹുമാനിക്കേണ്ടതുണ്ട്' അദ്ദേഹം കൂട്ടിച്ചേര്‍ത്തു.
