അനിയന് പിന്നാലെ ചേട്ടനേയും റാഞ്ചി കൊച്ചി, പുതിയ ചരിത്രമെഴുവാന്‍ സാംസണ്‍ സഹോദരന്മാര്‍
കേരള ക്രിക്കറ്റ് ലീഗിന്റെ (കെസിഎല്‍) രണ്ടാം സീസണിന് മുന്നോടിയായി നടന്ന ആവേശകരമായ താരലേലത്തില്‍ റെക്കോര്‍ഡ് തുകയ്ക്ക് സഞ്ജു സാംസണെ സ്വന്തമാക്കിയ കൊച്ചി ബ്ലൂ ടൈഗേഴ്‌സ്, സഹോദരനും ഓള്‍റൗണ്ടറുമായ സാലി സാംസണെയും ടീമിലെത്തിച്ചു. ഇതോടെ, വരാനിരിക്കുന്ന സീസണില്‍ സാംസണ്‍ സഹോദരന്മാര്‍ കൊച്ചിയുടെ നീലക്കുപ്പായത്തില്‍ ഒരുമിച്ച് കളിക്കുമെന്നുറപ്പായി.
പൊന്നുംവില നല്‍കി സഞ്ജുവിനെ
ഐപിഎല്‍ താരങ്ങള്‍ ഉള്‍പ്പെട്ട 'എ' കാറ്റഗറിയില്‍, 3 ലക്ഷം രൂപ മാത്രം അടിസ്ഥാന വിലയുണ്ടായിരുന്ന സഞ്ജു സാംസണുവേണ്ടി വാശിയേറിയ ലേലമാണ് നടന്നത്. ലീഗിലെ ഒട്ടുമിക്ക ഫ്രാഞ്ചൈസികളും സഞ്ജുവിനായി രംഗത്തെത്തിയതോടെ ലേലം മുറുകി. ഓരോ വിളിക്കും തുക ഉയര്‍ന്നുകൊണ്ടിരുന്നു. മറ്റ് ടീമുകള്‍ 25 ലക്ഷം രൂപ വരെ വാഗ്ദാനം ചെയ്ത് ശക്തമായ താല്‍പര്യം പ്രകടിപ്പിച്ചെങ്കിലും, ഒടുവില്‍ എല്ലാ റെക്കോര്‍ഡുകളും ഭേദിച്ച് 26.8 ലക്ഷം രൂപ എന്ന ചരിത്രത്തിലെ ഏറ്റവും ഉയര്‍ന്ന തുകയ്ക്ക് കൊച്ചി ബ്ലൂ ടൈഗേഴ്‌സ് സഞ്ജുവിനെ തങ്ങളുടെ കൂടാരത്തിലെത്തിക്കുകയായിരുന്നു. കെസിഎല്‍ ചരിത്രത്തിലെ തന്നെ ഏറ്റവും വലിയ ലേലത്തുകയാണിത്.
അടിസ്ഥാന വിലയ്ക്ക് സാലിയെ സ്വന്തമാക്കി കൊച്ചി
സഞ്ജുവിനായുള്ള പോരാട്ടത്തിന് ശേഷം, സഹോദരന്‍ സാലി സാംസണ്‍ ലേലത്തിനെത്തിയപ്പോള്‍ കാര്യങ്ങള്‍ തികച്ചും ശാന്തമായിരുന്നു. 'സി' കാറ്റഗറിയില്‍ ഉള്‍പ്പെട്ട സാലിയുടെ അടിസ്ഥാന വില 75,000 രൂപയായിരുന്നു. മറ്റ് ടീമുകളൊന്നും താരത്തിനായി മുന്നോട്ട് വരാതിരുന്ന സാഹചര്യത്തില്‍, അടിസ്ഥാന വിലയ്ക്ക് തന്നെ കൊച്ചി ബ്ലൂ ടൈഗേഴ്‌സ് സാലിയെ എളുപ്പത്തില്‍ സ്വന്തമാക്കി. കെസിഎല്ലിന്റെ പ്രഥമ സീസണിലും സാലി കൊച്ചിയുടെ ഭാഗമായിരുന്നു എന്നത് ശ്രദ്ധേയമാണ്.
ഓള്‍റൗണ്ടറായ സാലി, മുന്‍പ് വയനാടിനായും കളിച്ചിട്ടുണ്ട്. കേരള ക്രിക്കറ്റില്‍ ഏറെ അനുഭവസമ്പത്തുള്ള താരം കൂടിയാണ് അദ്ദേഹം. അണ്ടര്‍ 16 വിഭാഗത്തില്‍ സൗത്ത് സോണിന് വേണ്ടിയും, കേരളത്തിന്റെ അണ്ടര്‍ 23, അണ്ടര്‍ 25 ടീമുകളിലും സാലി അംഗമായിരുന്നു.
ലേലത്തിലെ കാറ്റഗറികള്‍
കെസിഎല്‍ താരലേലത്തില്‍ കളിക്കാരെ അവരുടെ പ്രൊഫൈല്‍ അനുസരിച്ച് മൂന്ന് കാറ്റഗറികളായി തിരിച്ചിരുന്നു:
- കാറ്റഗറി എ: ഐപിഎല്‍ പോലുള്ള പ്രധാന ടൂര്‍ണമെന്റുകളില്‍ കളിച്ച താരങ്ങള്‍. അടിസ്ഥാന വില: 3 ലക്ഷം രൂപ.
- കാറ്റഗറി ബി: മറ്റ് പ്രമുഖ താരങ്ങള്‍. അടിസ്ഥാന വില: 1 ലക്ഷം രൂപ.
- കാറ്റഗറി സി: യുവതാരങ്ങളും മറ്റ് കളിക്കാരും. അടിസ്ഥാന വില: 75,000 രൂപ.
സഞ്ജുവിനെപ്പോലെ ഒരു സൂപ്പര്‍ താരത്തെ റെക്കോര്‍ഡ് തുകയ്ക്കും, സഹോദരന്‍ സാലിയെ അടിസ്ഥാന വിലയ്ക്കും ടീമിലെത്തിക്കാന്‍ കഴിഞ്ഞത് കൊച്ചി ബ്ലൂ ടൈഗേഴ്‌സിന്റെ മികച്ച ലേല തന്ത്രമായാണ് വിലയിരുത്തപ്പെടുന്നത്. സാംസണ്‍ സഹോദരന്മാരുടെ സാന്നിധ്യം വരാനിരിക്കുന്ന സീസണില്‍ കൊച്ചിക്ക് വലിയ മുതല്‍ക്കൂട്ടാവുമെന്നുറപ്പാണ്.