താരങ്ങള്‍ക്ക് പിന്നാലെ ബാസ്റ്റേഴ്‌സ് ആരാധകര്‍ക്ക് നേരേയും ആക്രമണം, കൊല്‍ക്കത്തയില്‍ സംഘര്‍ഷാന്തരീക്ഷം
ഇന്ത്യന്‍ സൂപ്പര്‍ ലീഗില്‍ കേരള ബ്ലാസ്റ്റേഴ്‌സും മുഹമ്മദന്‍സ് എസ്.സിയും തമ്മിലുള്ള മത്സരത്തിനിടെ ബ്ലാസ്റ്റേഴ്‌സ് ആരാധകര്‍ക്ക് നേരെ ആക്രമണമുണ്ടായി. കൊല്‍ക്കത്തയിലെ കിഷോര്‍ ഭാരതി സ്റ്റേഡിയത്തിലാണ് സംഭവം.
ആദ്യം ഒരു ഗോളിന് പിന്നിലായ ശേഷം രണ്ട് ഗോളുകള്‍ തിരിച്ചടിച്ച് ബ്ലാസ്റ്റേഴ്‌സ് മത്സരത്തില്‍ വിജയിച്ചിരുന്നു. 75-ാം മിനിറ്റില്‍ ജീസസ് ജിമെനെസ് വിജയഗോള്‍ നേടിയതിന് പിന്നാലെയാണ് സംഘര്‍ഷമുണ്ടായത്.
67-ാം മിനിറ്റില്‍ ക്വാമി പെപ്ര ബ്ലാസ്റ്റേഴ്‌സിന്റെ ആദ്യ ഗോള്‍ നേടിയതിനെ തുടര്‍ന്ന് ആരാധകര്‍ ആഹ്ലാദ പ്രകടനം നടത്തിയിരുന്നു. തുടര്‍ന്ന് ജിമെനെസ് വിജയഗോള്‍ നേടിയതോടെ ആരാധകരുടെ ആവേശം ഇരട്ടിച്ചു. ഇതിനിടെ തൊട്ടടുത്ത സ്റ്റാന്‍ഡിലിരുന്ന മുഹമ്മദന്‍സ് ആരാധകര്‍ ബ്ലാസ്റ്റേഴ്‌സ് ആരാധകര്‍ക്ക് നേരെ കുപ്പികളും ചെരിപ്പുകളും എറിഞ്ഞു.
മൈതാനത്തേക്കും കളിക്കാര്‍ക്ക് നേരെയും വസ്തുക്കള്‍ വലിച്ചെറിഞ്ഞതോടെ റഫറി മത്സരം നിര്‍ത്തിവച്ചു. മുഹമ്മദന്‍സിന് അനുകൂലമായ ഒരു പെനാല്‍റ്റി നിഷേധിച്ചതും കാണികളെ പ്രകോപിപ്പിച്ചിരുന്നു.
