കൊച്ചി വിടാന്‍ ആലോചിച്ച് കേരള ബ്ലാസ്റ്റേഴ്സ്, നേരിടുന്നത് വന്‍ ഭീഷണി
കേരള ബ്ലാസ്റ്റേഴ്സിന്റെ ഹോം ഗ്രൗണ്ടായ കലൂര്‍ സ്റ്റേഡിയത്തില്‍ നിന്ന് താല്‍ക്കാലികമായി മാറി നില്‍ക്കാനുള്ള ആലോചനയില്‍ നിന്നും ക്ലബ്ബ് പിന്‍മാറി. 2024-25 സീസണിന്റെ തുടക്കത്തില്‍ ഹൈദരാബാദിലെ ഒരു സ്റ്റേഡിയം ബാക്കപ്പ് ഓപ്ഷനായി പരിഗണിച്ചിരുന്നുവെങ്കിലും ഒടുവില്‍ ഈ തീരുമാനം തിരുത്തുകയായിരുന്നു.
സൂപ്പര്‍ ലീഗ് കേരള ക്ലബ്ബുകള്‍ കലൂര്‍ സ്റ്റേഡിയത്തില്‍ ബ്ലാസ്റ്റേഴ്സിനെ മറികടന്ന് മത്സരങ്ങള്‍ സംഘടിപ്പിക്കാന്‍ ഒരുങ്ങിയതാണ് ഈ ആലോചനയ്ക്ക് കാരണമായത്. എന്നാല്‍, ഇരു കൂട്ടരും തമ്മില്‍ ഒടുവില്‍ ധാരണയിലെത്തിയതോടെ ബ്ലാസ്റ്റേഴ്സ് ഹൈദരാബാദ് എന്ന ബാക്കപ്പ് ഓപ്ഷന്‍ ഒഴിവാക്കി.
നേരത്തെ, ബ്ലാസ്റ്റേഴ്സിന്റെ പരിശീലന ഗ്രൗണ്ടായ പനമ്പിള്ളി നഗര്‍ ഗ്രൗണ്ടും സൂപ്പര്‍ ലീഗ് കേരള ക്ലബ്ബുകള്‍ ബുക്ക് ചെയ്തിരുന്നു. ഈ സാഹചര്യത്തില്‍, ക്ലബ്ബിന്റെ ഹോം മത്സരങ്ങള്‍ക്കും പരിശീലനത്തിനും ബദല്‍ സംവിധാനങ്ങള്‍ ഒരുക്കേണ്ടി വരുമെന്ന ആശങ്ക ഉയര്‍ന്നിരുന്നു.
എന്നാല്‍, ഒടുവില്‍ സൂപ്പര്‍ ലീഗ് ക്ലബ്ബുകളുമായി ധാരണയിലെത്തിയതോടെ കലൂര്‍ സ്റ്റേഡിയം തന്നെ ബ്ലാസ്റ്റേഴ്സിന്റെ ഹോം ഗ്രൗണ്ടായി തുടരും. ഈ തീരുമാനം ആരാധകര്‍ക്ക് ആശ്വാസം പകരുന്നതാണ്.