കുരുതി നടത്തി കേരളം, ബിഹാറിന് ഫോളോ ഓണ്‍, സല്യൂട്ട് ജലജ് ആന്‍ഡ് നിസാര്‍
രഞ്ജി ട്രോഫിയില്‍ നിര്‍ണ്ണായക മത്സരത്തില്‍ കേരളത്തിന്റെ തകര്‍പ്പന്‍ പ്രകടനം. കേരളത്തിന്റെ ഒന്നാം ഇന്നിംഗ്സ് സ്‌കോറായ 351 റണ്‍സിന് മറുപടിയായി ബിഹാര്‍ കേവലം 64 റണ്‍സിന് തകര്‍ന്നടിഞ്ഞു. ഇതോടെ ഫോളോ ഓണ്‍ ചെയ്യപ്പെട്ട ബിഹാര്‍ രണ്ടാം ഇന്നിംഗ്സ് ബാറ്റ് ചെയ്യുകയാണ്. ഒടുവില്‍ റിപ്പോര്‍ട്ട് കിട്ടുമ്പോള്‍ ബിഹാര്‍ രണ്ടാം ഇന്നിംഗ്‌സില്‍ രണ്ട് വിക്കറ്റ് നഷ്ടത്തില്‍ 39 റണ്‍സ് എന്ന നിലയിലാണ്. ഇതോടെ കേരളത്തിന്റെ ഒന്നാം ഇന്നിംഗ്സ് മറികടക്കാന്‍ ബിഗാറിന് ഇനി 248 റണ്‍സ് കൂടി വേണം.
ജലജ് സക്‌സേനയുടെ തകര്‍പ്പന്‍ ബൗളിംഗ് പ്രകടനമാണ് ബിഹാറിന് ഒന്നാം ഇന്നിംഗ്‌സില്‍ വിനയായത്. 7.1 ഓവറില്‍ വെറും 19 റണ്‍സ് വഴങ്ങി അഞ്ച് വിക്കറ്റാണ് ജലജ് സ്വന്തമാക്കിയത്. നിതീഷ് രണ്ട്ും വൈശാഖ് ചന്ദ്രനും സര്‍വതെയും ഓരോ വിക്കറ്റ് വീതവും വീഴ്ത്തി.
21 റണ്‍സെടുത്ത ശ്രമാന്‍ നിഗ്‌റോദും 13 റണ്‍സെടുത്ത അയുഷ് ലോഹാരുകയുമാണ് ബിഹാറിനായി രണ്ടക്കം കടന്ന ഏക ബാറ്റര്‍മാര്‍.
നേരത്തെ ആദ്യ ഇന്നിംഗ്‌സില്‍ കേരളം 351 റണ്‍സാണ് നേടിയത്. രണ്ടാം ദിനം ഒമ്പത് വിക്കറ്റിന് 302 റണ്‍സില്‍ ബാറ്റിംഗ് ആരംഭിച്ച കേരളത്തിന് വേണ്ടി സല്‍മാന്‍ നിസാര്‍ 150 റണ്‍സെടുത്തു. വൈശാഖ് ചന്ദ്രന്‍ അഞ്ച് റണ്‍സുമായി പുറത്താകാതെ നിന്നു. ആദ്യ ദിനം 111 റണ്‍സുമായി പുറത്താകാതെ നിന്ന നിസാര്‍, രണ്ടാം ദിനം 39 റണ്‍സ് കൂടി നേടി കേരളത്തിന്റെ സ്‌കോര്‍ 350 കടത്തി.
ഇതോടെ അവസാന വിക്കറ്റില്‍ ഇരുവരും വിലപ്പെട്ട 70 റണ്‍സാണ് കേരള സ്‌കോര്‍ ബോര്‍ഡിലെത്തിച്ചത്. ബിഹാറിനായി ഹര്‍ഷ് വിക്രം സിംഗും സച്ചിന്‍ കുമാര്‍ സിംഗും ഘുലാം റബ്ബാനിയും രണ്ട് വിക്കറ്റ് വീതം വീഴ്ത്തി.
മത്സരത്തിന്റെ ആദ്യ ദിനം, തുടക്കത്തില്‍ 81-4 എന്ന നിലയിലും പിന്നീട് 202-8 എന്ന നിലയിലും തകര്‍ന്ന കേരളത്തെ, സല്‍മാന്‍ നിസാറിന്റെ സെഞ്ച്വറിയും എം.ഡി. നിധീഷിന്റെ മികച്ച പിന്തുണയും ചേര്‍ന്നാണ് മികച്ച സ്‌കോറിലേക്ക് നയിച്ചത്.
ടീം സ്‌കോര്‍ 281ല്‍ എത്തിയപ്പോള്‍ നിധീഷ് പുറത്തായി. തുടര്‍ന്ന് അക്ഷയ് ചന്ദ്രനെ കൂട്ടുപിടിച്ച് സെഞ്ച്വറി പൂര്‍ത്തിയാക്കിയ നിസാര്‍, അവസാന വിക്കറ്റില്‍ വൈശാഖ് ചന്ദ്രനൊപ്പം 70 റണ്‍സ് കൂട്ടിചേര്‍ത്തു. ഇതില്‍ വൈശാഖിന്റെ സംഭാവന അഞ്ച് റണ്‍സ് മാത്രമായിരുന്നു.
കേരളത്തിന് ഈ മത്സരം നിര്‍ണായകമാണ്. മധ്യപ്രദേശിനെതിരായ സമനിലയോടെ പോയിന്റ് പട്ടികയില്‍ ഗ്രൂപ്പ് സിയില്‍ കേരളം രണ്ടാം സ്ഥാനത്താണ്. ആറ് മത്സരങ്ങള്‍ പൂര്‍ത്തിയാക്കിയ കേരളത്തിന് 21 പോയിന്റാണുള്ളത്. രണ്ട് മത്സരം ജയിച്ചപ്പോള്‍ നാലെണ്ണം സമനിലയില്‍ അവസാനിച്ചു. ഈ മത്സരം ആദ്യ ഇന്നിംഗ്സ് ലീഡോടെ സമനിലയെങ്കിലും പിടിച്ചാല്‍ കേരളത്തിന് ക്വാര്‍ട്ടറില്‍ പ്രവേശിക്കാം. ഗ്രൂപ്പില്‍ ഒന്നാം സ്ഥാനത്തുള്ള ഹരിയാനക്കെതിരെ കര്‍ണാടക ഒന്നാം ഇന്നിംഗ്സ് ലീഡോടെ ഇന്നിംഗ്സ് ജയം നേടാതിരിക്കുകയും വേണം.
