രാഹുലിന് സെഞ്ചുറിയും അർദ്ധസെഞ്ചുറിയും, യുവതാരങ്ങൾക്കും തിളക്കം; ഇംഗ്ലണ്ട് ലയൺസിനെതിരായ രണ്ടാം ടെസ്റ്റിലും സമനില

ഇന്ത്യൻ സീനിയർ ടീമിലേക്കുള്ള വാതിൽക്കൽ നിൽക്കുന്ന യുവതാരങ്ങളുടെയും, ടീമിലേക്ക് ശക്തമായ തിരിച്ചുവരവ് ലക്ഷ്യമിടുന്ന സീനിയർ താരങ്ങളുടെയും പോരാട്ടവീര്യം കണ്ട മത്സരത്തിനും ഒടുവിൽ സമനിലയുടെ ക്ലൈമാക്സ്. ഇംഗ്ലണ്ട് ലയൺസിനെതിരായ രണ്ടാം അനൗദ്യോഗിക ടെസ്റ്റിലും ഇന്ത്യ എ ടീം സമനില വഴങ്ങി. കൂറ്റൻ വിജയലക്ഷ്യത്തിന് മുന്നിൽ പതറിയ ഇംഗ്ലണ്ടിനെതിരേ ഇന്ത്യൻ ബൗളർമാർ പിടിമുറുക്കിയെങ്കിലും, മത്സരം സമനിലയിൽ അവസാനിപ്പിക്കാൻ ഇരു ടീമുകളും തീരുമാനിക്കുകയായിരുന്നു. ഓപ്പണറായി ഇറങ്ങി ആദ്യ ഇന്നിംഗ്സിൽ സെഞ്ചുറിയും രണ്ടാം ഇന്നിംഗ്സിൽ അർദ്ധസെഞ്ചുറിയും നേടിയ കെ.എൽ രാഹുലിന്റെ തകർപ്പൻ പ്രകടനമാണ് മത്സരത്തിലെ പ്രധാന ആകർഷണം.

ഇന്ത്യൻ ബാറ്റിംഗ് നിരയുടെ രണ്ടാം വരവ്

ആദ്യ ഇന്നിംഗ്സിൽ നേടിയ 21 റൺസിൻ്റെ നേരിയ ലീഡുമായി രണ്ടാം ഇന്നിംഗ്‌സ് ആരംഭിച്ച ഇന്ത്യ എ, ഏഴ് വിക്കറ്റ് നഷ്ടത്തിൽ 417 റൺസ് എന്ന നിലയിൽ ഡിക്ലയർ ചെയ്ത് ഇംഗ്ലണ്ടിന് മുന്നിൽ 439 റൺസിൻ്റെ കൂറ്റൻ വിജയലക്ഷ്യം വെച്ചു. ക്യാപ്റ്റൻ അഭിമന്യു ഈശ്വരൻ (80), ആദ്യ ഇന്നിംഗ്സിലെ ഹീറോ കെ.എൽ രാഹുൽ (51), ഓൾറൗണ്ടർമാരായ തനുഷ് കൊട്ടിയൻ (90), അൻഷൂൽ കാംബോജ് (51) എന്നിവരുടെ ഇന്നിംഗ്സുകളാണ് ഇന്ത്യയ്ക്ക് മികച്ച സ്കോർ സമ്മാനിച്ചത്. വിജയത്തിനായി പൊരുതാനുറച്ച ഇന്ത്യൻ ബൗളിംഗിന് മുന്നിൽ മറുപടി ബാറ്റിംഗിനിറങ്ങിയ ഇംഗ്ലണ്ട് 32 റൺസെടുക്കുന്നതിനിടെ മൂന്ന് വിക്കറ്റ് നഷ്ടപ്പെട്ട് പതറിയെങ്കിലും, മത്സരം സമനിലയിൽ അവസാനിപ്പിക്കാൻ തീരുമാനിക്കുകയായിരുന്നു. അൻഷൂൽ കാംബോജ് ഇന്ത്യക്കായി രണ്ട് വിക്കറ്റ് വീഴ്ത്തി.

ഒന്നാം ഇന്നിംഗ്സ്: രാഹുലിൻ്റെ സെഞ്ചുറി കരുത്തിൽ

നേരത്തെ, ടോസ് നേടി ബാറ്റിംഗിനിറങ്ങിയ ഇന്ത്യയുടെ തുടക്കം അത്ര മികച്ചതായിരുന്നില്ല. ക്രിസ് വോക്സിൻ്റെ തീപ്പൊരി പന്തുകൾക്ക് മുന്നിൽ ഓപ്പണർ യശസ്വി ജയ്സ്വാളിനും (17) ക്യാപ്റ്റൻ അഭിമന്യൂ ഈശ്വരനും (11) കാലിടറി. 40 റൺസിന് രണ്ട് വിക്കറ്റ് എന്ന നിലയിൽ പതറിയ ഇന്ത്യയെ, കെ.എൽ രാഹുൽ - കരുൺ നായർ സഖ്യം കരകയറ്റി. മൂന്നാം വിക്കറ്റിൽ 86 റൺസ് കൂട്ടിച്ചേർത്ത ഈ സഖ്യം പിരിഞ്ഞ ശേഷം, ധ്രുവ് ജുറലിനെ കൂട്ടുപിടിച്ച് രാഹുൽ ഇന്ത്യൻ സ്കോർബോർഡ് ചലിപ്പിച്ചു.

ഓപ്പണറുടെ റോളിൽ തൻ്റെ ക്ലാസ് ഒരിക്കൽ കൂടി തെളിയിച്ച രാഹുൽ 15 ഫോറുകളുടെയും ഒരു സിക്സിന്റെയും അകമ്പടിയോടെ 116 റൺസ് നേടി. ധ്രുവ് ജുറൽ (52), കരുൺ നായർ (40) എന്നിവരുടെ പിന്തുണ കൂടിയായപ്പോൾ ഇന്ത്യൻ സ്കോർ 348-ൽ എത്തി. രാഹുലും ജുറലും ചേർന്ന് 121 റൺസിന്റെ കൂട്ടുകെട്ടാണ് പടുത്തുയർത്തിയത്.

മറുപടിയിൽ പതറിയ ലയൺസ്, തിളങ്ങി ഖലീൽ

ഇന്ത്യയുടെ സ്കോറിന് മറുപടി പറയാനിറങ്ങിയ ഇംഗ്ലണ്ട് ലയൺസിനെ, ഇടംകൈയ്യൻ പേസർ ഖലീൽ അഹമ്മദിന്റെ നേതൃത്വത്തിൽ ഇന്ത്യൻ ബൗളർമാർ വരിഞ്ഞുമുറുക്കി. എമിലിയോ ഗേ (71), ടോം ഹെയ്നസ് (54), ജോർദാൻ കോക്സ് (45) എന്നിവർ പൊരുതി നോക്കിയെങ്കിലും, ഇംഗ്ലണ്ടിന്റെ ഒന്നാം ഇന്നിംഗ്സ് 327 റൺസിൽ അവസാനിച്ചു. ഖലീൽ നാല് വിക്കറ്റുകൾ വീഴ്ത്തിയപ്പോൾ, അൻഷുൽ കാംബോജ്, തുഷാർ ദേശ്പാണ്ഡെ എന്നിവർ രണ്ട് വിക്കറ്റ് വീതം വീഴ്ത്തി 21 റൺസിൻ്റെ നിർണായക ലീഡ് ഇന്ത്യക്ക് സമ്മാനിച്ചു. മത്സരത്തിൽ ബാറ്റുകൊണ്ടും പന്തുകൊണ്ടും തിളങ്ങിയ അൻഷൂൽ കാംബോജ് ഇന്ത്യൻ ക്രിക്കറ്റിന്റെ വാഗ്ദാനമായി മാറുകയാണ്. അതേസമയം, ഇഷാൻ കിഷൻ, റുതുരാജ് ഗെയ്കവാദ് തുടങ്ങിയ പ്രമുഖ താരങ്ങൾക്ക് ഈ മത്സരത്തിലും അവസരം ലഭിച്ചില്ല.