ആവേശം അവസാനം വരെ, കമ്മിന്‍സ് രക്ഷകന്‍, പാകിസ്ഥാനെ തകര്‍ത്ത് ഓസീസ്
മെല്‍ബണില്‍ പാകിസ്ഥാനെതിരായ ആദ്യ ഏകദിനത്തില്‍ ഓസ്‌ട്രേലിയക്ക് ആവേശകരമായ ജയം. അവസാന ഓവറുകള്‍ വരെ ജയപരാജയങ്ങള്‍ മാറിമറിഞ്ഞ മത്സരത്തില്‍ രണ്ട് വിക്കറ്റിനാണ് ഓസ്‌ട്രേലിയ പാകിസ്ഥാനെ തകര്‍ത്ത.
പാകിസ്ഥാന് ഇന്നിംഗ്‌സ്:
ടോസ് നഷ്ടപ്പെട്ട് ബാറ്റിംഗിനിറങ്ങിയ പാകിസ്ഥാന് മിച്ചല്‍ സ്റ്റാര്‍ക്കിന്റെ (3/33) മികച്ച ബൗളിംഗിന് മുന്നില്‍ 203 റണ്‍സിന് പുറത്തായി. മുഹമ്മദ് റിസ്വാന്‍ (44) പാകിസ്ഥാന്റെ ടോപ് സ്‌കോറര്‍. നസീം ഷായും (40) മികച്ച പ്രകടനം കാഴ്ചവച്ചു.
ഓസ്‌ട്രേലിയന്‍ ഇന്നിംഗ്‌സ്:
204 റണ്‍സ് വിജയലക്ഷ്യവുമായി ഇറങ്ങിയ ഓസ്‌ട്രേലിയ തുടക്കത്തില്‍ തന്നെ മാത്യു ഷോര്‍ട്ടിനെയും (1) ജേക്ക് ഫ്രേസര്‍-മക്ഗുര്‍ക്കിനെയും (16) നഷ്ടപ്പെട്ടു. എന്നാല്‍ ജോഷ് ഇംഗ്ലിസും (49) സ്റ്റീവന്‍ സ്മിത്തും (44) ചേര്‍ന്ന് ടീമിനെ മുന്നോട്ട് നയിച്ചു.
പാകിസ്ഥാന് പേസര്‍മാര്‍ തിരിച്ചുവരവ് നടത്തിയതോടെ ഓസ്‌ട്രേലിയ 155/7 എന്ന നിലയിലായി. എന്നാല്‍ ക്യാപ്റ്റന്‍ പാറ്റ് കമ്മിന്‍സ് (32*) പുറത്താകാതെ നിന്ന് ഓസ്‌ട്രേലിയയെ വിജയത്തിലെത്തിച്ചു.
ഹാരിസ് റൗഫ് (3 വിക്കറ്റ്), ഷഹീന്‍ അഫ്രീദി (2 വിക്കറ്റ്) എന്നിവര്‍ പാകിസ്ഥാന് വേണ്ടി തിളങ്ങി. ഇതോടെ മൂന്ന് മത്സരങ്ങളുടെ പരമ്പരയില്‍ ഓസ്‌ട്രേലിയ 1-0 ന് മുന്നിലെത്തി.
