ബാറ്റില്‍ സ്വയം 'രാജകുമാരന്‍' എന്ന് എഴുതി ഗില്‍, സ്വയം പൊങ്ങിയെന്ന് താക്കീത് ചെയ്ത് ക്രിക്കറ്റ് ലോകം
ഇന്ത്യന്‍ ക്രിക്കറ്റിന്റെ ഭാവി എന്ന് വാഴ്ത്തപ്പെടുന്ന ശുഭ്മാന്‍ ഗില്‍, പുതിയ ടെസ്റ്റ് ക്യാപ്റ്റനായി ഇംഗ്ലണ്ട് പര്യടനത്തിന് തയ്യാറെടുക്കുമ്പോള്‍ അപ്രതീക്ഷിത വിവാദത്തില്‍ അകപ്പെട്ടിരിക്കുകയാണ്. ഗില്ലിന്റെ കരിയറിലെ നിര്‍ണായക ചുവടുവെപ്പായ എംആര്‍എഫ് ബാറ്റ് സ്‌പോണ്‍സര്‍ഷിപ്പാണ് ഇപ്പോള്‍ ആരാധകരുടെ വിമര്‍ശനത്തിന് കാരണമായിരിക്കുന്നത്. ക്രിക്കറ്റ് ഇതിഹാസങ്ങളുടെ ബാറ്റില്‍ മാത്രം കണ്ടിരുന്ന എംആര്‍എഫ് സ്റ്റിക്കറിനൊപ്പം ഗില്‍ 'രാജകുമാരന്‍' (Prince) എന്ന് കൂടി ചേര്‍ത്തതാണ് ആരാധകരെ ചൊടിപ്പിച്ചത്.
ഇതിഹാസങ്ങള്‍ നടന്ന വഴി
എംആര്‍എഫ് എന്ന മൂന്നക്ഷരത്തിന് ക്രിക്കറ്റ് ലോകത്ത് സവിശേഷമായ ഒരു സ്ഥാനമുണ്ട്. ലോകം കണ്ട ഏറ്റവും മികച്ച ബാറ്റര്‍മാരുടെ പ്രതീകമായിരുന്നു ഒരുകാലത്ത് ഈ ബ്രാന്‍ഡ്. സച്ചിന്‍ ടെണ്ടുല്‍ക്കര്‍, ബ്രയാന്‍ ലാറ, എബി ഡിവില്ലിയേഴ്‌സ്, വിരാട് കോലി തുടങ്ങിയ ഇതിഹാസങ്ങളുടെ ബാറ്റിലാണ് എംആര്‍എഫ് സ്റ്റിക്കര്‍ പതിഞ്ഞിരുന്നത്. ഇവരുടെയെല്ലാം ബാറ്റുകളില്‍ 'ജീനിയസ്' (Genius) എന്ന വാക്കാണ് എംആര്‍എഫ് ഉപയോഗിച്ചിരുന്നത്. തലമുറയിലെ ഏറ്റവും മികച്ച കളിക്കാരെ കണ്ടെത്തി അവരുമായി സഹകരിക്കുന്ന ഒരു പാരമ്പര്യം എംആര്‍എഫിനുണ്ട്. ആ നിരയിലേക്കാണ് യുവതാരമായ ശുഭ്മാന്‍ ഗില്ലിനെ അവര്‍ തിരഞ്ഞെടുത്തത്. ഏകദിന ക്രിക്കറ്റില്‍ മികച്ച പ്രകടനം കാഴ്ചവെച്ചിട്ടുണ്ടെങ്കിലും, ടെസ്റ്റ് ക്രിക്കറ്റില്‍ ഇനിയും തന്റെ സ്ഥാനം ഉറപ്പിക്കാനിരിക്കുന്ന ഗില്ലിന് ലഭിച്ച വലിയൊരു അംഗീകാരമായിരുന്നു ഇത്.
ഈ വര്‍ഷത്തെ ചാമ്പ്യന്‍സ് ട്രോഫി സെമിഫൈനലിന് മുന്നോടിയായി ഗില്ലുമായുള്ള സഹകരണം പ്രഖ്യാപിച്ചുകൊണ്ട് എംആര്‍എഫ് കുറിച്ചത് ഇങ്ങനെയായിരുന്നു: 'സച്ചിന്‍ ടെണ്ടുല്‍ക്കര്‍, വിരാട് കോലി, ബ്രയാന്‍ ലാറ തുടങ്ങിയ ഇതിഹാസങ്ങള്‍ അണിഞ്ഞ എംആര്‍എഫ് ബാറ്റിന്റെ പാരമ്പര്യം ഇനി ശുഭ്മാന്‍ ഗില്‍ മുന്നോട്ട് കൊണ്ടുപോകുന്നു, അടുത്ത തലമുറയിലെ ക്രിക്കറ്റര്‍മാര്‍ക്ക് പ്രചോദനമേകുന്നു.'
'രാജകുമാരന്‍' വരുത്തിയ വിന
ഇംഗ്ലണ്ട് പര്യടനത്തിന് മുന്നോടിയായി ബിസിസിഐ പുറത്തുവിട്ട ഇന്ത്യന്‍ ടീമിന്റെ പുതിയ ജേഴ്‌സിയിലുള്ള ചിത്രങ്ങളാണ് വിവാദങ്ങള്‍ക്ക് തുടക്കമിട്ടത്. ചിത്രങ്ങളില്‍ ഗില്‍ പിടിച്ചിരിക്കുന്ന ബാറ്റ് ആരാധകര്‍ ശ്രദ്ധിച്ചു. 'MRF Genius' എന്നതിനൊപ്പം 'Prince' എന്നും അതില്‍ എഴുതിയിരുന്നു. ഗില്ലിനെ ആരാധകരും ക്രിക്കറ്റ് വിദഗ്ധരും സ്‌നേഹത്തോടെ 'രാജകുമാരന്‍' എന്ന് വിശേഷിപ്പിക്കാറുണ്ടെങ്കിലും, അത് ബാറ്റില്‍ തന്നെ ഒരു വിശേഷണമായി ചേര്‍ത്തത് പലര്‍ക്കും ദഹിച്ചില്ല.
സമൂഹമാധ്യമങ്ങളില്‍ ഇതുമായി ബന്ധപ്പെട്ട് വലിയ ചര്‍ച്ചകളാണ് നടക്കുന്നത്. ക്രിക്കറ്റ് ലോകം 'ദൈവം' എന്ന് വിശേഷിപ്പിച്ച സച്ചിന്‍ ടെണ്ടുല്‍ക്കര്‍ ഒരിക്കലും തന്റെ ബാറ്റില്‍ ആ വാക്ക് ഉപയോഗിച്ചിട്ടില്ലെന്നും, 'കിംഗ്' കോലി എന്ന് അറിയപ്പെടുന്ന വിരാട് കോലി ആ വിശേഷണം ബാറ്റില്‍ ചേര്‍ത്തിട്ടില്ലെന്നും ആരാധകര്‍ ചൂണ്ടിക്കാട്ടുന്നു. വെസ്റ്റിന്‍ഡീസിന്റെ ഇതിഹാസ താരം ബ്രയാന്‍ ലാറയായിരുന്നു ക്രിക്കറ്റിലെ ആദ്യ 'രാജകുമാരന്‍', അദ്ദേഹവും ഇത്തരം വിശേഷണങ്ങള്‍ ബാറ്റില്‍ ഉപയോഗിച്ചിരുന്നില്ല. ഗില്ലിന്റെ ഈ നടപടി അല്പം കടന്നുപോയി എന്നും വിനയമാണ് ഒരു കളിക്കാരന് വേണ്ട പ്രധാന ഗുണമെന്നും ആരാധകര്‍ ഓര്‍മ്മിപ്പിക്കുന്നു.
ഈ വിശേഷണം ഗില്ലിന്റെ സ്വന്തം തീരുമാനമാണോ അതോ എംആര്‍എഫിന്റെ മാര്‍ക്കറ്റിംഗ് തന്ത്രമാണോ എന്ന് വ്യക്തമല്ല. ഈ ഐപിഎല്‍ സീസണിന്റെ മധ്യത്തില്‍ തന്നെ ഗില്ലിന്റെ ബാറ്റില്‍ ഈ വാക്ക് പ്രത്യക്ഷപ്പെട്ടിരുന്നുവെങ്കിലും, രോഹിത് ശര്‍മ്മയ്ക്ക് ശേഷം ഇന്ത്യയുടെ ടെസ്റ്റ് നായകനായി പ്രഖ്യാപിക്കപ്പെട്ടതോടെയാണ് ഇത് കൂടുതല്‍ ശ്രദ്ധ നേടിയതും വിവാദമായതും.
പുതിയ നായകന്‍, പുതിയ വെല്ലുവിളികള്‍
നായകനായ ശേഷമുള്ള തന്റെ ആദ്യ അഭിസംബോധനയില്‍, ഓരോ പരിശീലന സെഷനും അര്‍ത്ഥവത്താക്കണമെന്നും ഓരോ പന്തും ഒരു ലക്ഷ്യത്തോടെ കളിക്കണമെന്നും ഗില്‍ സഹതാരങ്ങളോട് ആവശ്യപ്പെട്ടിരുന്നു. 'സമ്മര്‍ദ്ദഘട്ടങ്ങളില്‍ എങ്ങനെ കളിക്കുമെന്ന് നാം പരിശീലനത്തിലൂടെ കണ്ടെത്തണം. ഓരോ പരിശീലന മത്സരത്തെയും ഗൗരവത്തോടെ കാണണം,' ഗില്‍ പറഞ്ഞു.
നായകനെന്ന നിലയില്‍ പക്വതയാര്‍ന്ന വാക്കുകളുമായി മുന്നോട്ട് വന്ന ഗില്ലിന് ഈ ബാറ്റ് വിവാദം ഒരു ചെറിയ കല്ലുകടിയായിരിക്കുകയാണ്. 2025 ജൂണ്‍ മുതല്‍ ഓഗസ്റ്റ് വരെ നടക്കുന്ന ഇംഗ്ലണ്ട് പര്യടനം ഗില്ലിന്റെ കരിയറിലെ ഏറ്റവും വലിയ പരീക്ഷണമാണ്. ലീഡ്സിലെ ഹെഡിങ്ലി, ബര്‍മിംഗ്ഹാമിലെ എഡ്ജ്ബാസ്റ്റണ്‍, ലണ്ടനിലെ ലോര്‍ഡ്സ്, ദി ഓവല്‍, മാഞ്ചസ്റ്ററിലെ ഓള്‍ഡ് ട്രാഫോര്‍ഡ് എന്നിവിടങ്ങളിലാണ് മത്സരങ്ങള്‍. ബാറ്റിലെ 'രാജകുമാരന്‍' എന്ന വിശേഷണം കളിക്കളത്തിലെ പ്രകടനത്തിലൂടെ അന്വര്‍ത്ഥമാക്കേണ്ട വലിയ ഉത്തരവാദിത്തമാണ് ഇനി ഗില്ലിന് മുന്നിലുള്ളത്.