ലഖ്നൗ പുറത്താക്കിയേക്കുമെന്ന്, പൊട്ടിത്തെറിച്ച് റിഷഭ് പന്ത്
ഐപിഎല്ലില്‍ ലഖ്നൗ സൂപ്പര്‍ ജയന്റ്സിന്റെ ക്യാപ്റ്റന്‍ ഋഷഭ് പന്തിന്് തൊട്ടതെല്ലാം പിഴച്ച സീസണാണ് കടന്നുപോകുന്നത്. മോശം പ്രകടനത്തിന് പിന്നാലെ പന്തിന് നേരെ നിരവധി വിമര്‍ശനങ്ങളും പരിഹാസങ്ങളും ഉയരുന്നുണ്ട്. ഇതിനിടെ അടുത്ത ഐപിഎല്ലിന് മുന്നോടിയായി പന്തിനെ ടീമില്‍ നിന്ന് പുറത്താക്കുമെന്ന ഒരു മാധ്യമപ്രവര്‍ത്തകന്റെ അവകാശവാദം താരത്തെ ചൊടിപ്പിച്ചിരിക്കുകയാണ്. നരേന്ദ്ര മോദി സ്റ്റേഡിയത്തില്‍ ഗുജറാത്ത് ടൈറ്റന്‍സിനെതിരായ എല്‍എസ്ജിയുടെ ഗ്രൂപ്പ് ഘട്ട മത്സരത്തിന് മണിക്കൂറുകള്‍ക്ക് മുമ്പാണ് ഈ സമൂഹമാധ്യമ പോര് അരങ്ങേറിയത്.
റെക്കോര്‍ഡ് വിലയും നിരാശാജനകമായ പ്രകടനവും
കഴിഞ്ഞ മെഗാ ലേലത്തില്‍ 27 കോടി രൂപ എന്ന ഞെട്ടിക്കുന്ന തുകയ്ക്ക് എല്‍എസ്ജി സ്വന്തമാക്കിയ പന്ത്, ഈ ഐപിഎല്‍ സീസണില്‍ തന്റെ കരിയറിലെ ഏറ്റവും മോശം പ്രകടനങ്ങളിലൊന്നാണ് കാഴ്ചവെച്ചത്. ഈ സീസണില്‍ 12 മത്സരങ്ങളില്‍ നിന്ന് 12 ശരാശരിയിലും 100 സ്‌ട്രൈക്ക് റേറ്റിലും വെറും 135 റണ്‍സ് മാത്രമാണ് പന്തിന് നേടാനായത്. രണ്ട് മത്സരങ്ങള്‍ കൂടി ശേഷിക്കെ, വെറും 10 പോയിന്റുമായി എല്‍എസ്ജിക്ക് പ്ലേഓഫ് സാധ്യതകള്‍ പൂര്‍ണ്ണമായും നഷ്ടമായിക്കഴിഞ്ഞു.
മാധ്യമപ്രവര്‍ത്തകന്റെ അവകാശവാദം, പന്തിന്റെ മറുപടി
27 കോടി രൂപ വലിയ തുകയാണെന്ന് എല്‍എസ്ജി മാനേജ്മെന്റിന് തോന്നുന്നതിനാല്‍ അടുത്ത സീസണിന് മുന്നോടിയായി പന്തിനെ റിലീസ് ചെയ്യാന്‍ സാധ്യതയുണ്ടെന്നാണ മാധ്യമപ്രവര്‍ത്തകന്‍ വൈഭവ് ഭോല എക്‌സില്‍ (മുമ്പ് ട്വിറ്റര്‍) കുറിച്ചു.
'ഐപിഎല്‍ 2026-ന് മുന്നോടിയായി ലഖ്നൗ സൂപ്പര്‍ ജയന്റ്സ് ഋഷഭ് പന്തിനെ പുറത്തുവിടാന്‍ സാധ്യതയുണ്ട്. 27 കോടി രൂപ വളരെ കൂടുതലാണെന്ന് എല്‍എസ്ജി മാനേജ്മെന്റിന് തോന്നുന്നു' എന്നായിരുന്നു വൈഭവ് ഭോലയുടെ പോസ്റ്റ്.
ഈ അവകാശവാദത്തെ ഋഷഭ് പന്ത് രൂക്ഷമായി വിമര്‍ശിച്ചു. ഭോലയുടെ വാദം 'വ്യാജ വാര്‍ത്ത' ആണെന്ന് വിശേഷിപ്പിച്ച പന്ത്, കൂടുതല്‍ ഉത്തരവാദിത്തത്തോടെ പെരുമാറാന്‍ അദ്ദേഹത്തെ ഉപദേശിച്ചു.
'വ്യാജ വാര്‍ത്തകള്‍ക്ക് കൂടുതല്‍ പ്രചാരം ലഭിക്കുമെന്ന് ഞാന്‍ മനസ്സിലാക്കുന്നു, പക്ഷേ എല്ലാ കാര്യങ്ങളും അതിനെ അടിസ്ഥാനമാക്കി മാത്രം നിര്‍മ്മിക്കരുത്. അജണ്ടകളോടെ വ്യാജ വാര്‍ത്തകള്‍ ഉണ്ടാക്കുന്നതിന് പകരം ചെറിയ വിവരങ്ങളും വിശ്വസനീയമായ വാര്‍ത്തകളും കൂടുതല്‍ സഹായകമാകും. നന്ദി, നല്ലൊരു ദിനം. സമൂഹമാധ്യമങ്ങളില്‍ നമ്മള്‍ പങ്കുവെക്കുന്ന കാര്യങ്ങളില്‍ ഉത്തരവാദിത്തവും വിവേകവും കാണിക്കാം' പന്ത് എക്‌സിലൂടെ കുറിച്ചു.
തുടരുന്ന വിമര്‍ശനങ്ങളും ടീമിന്റെ അവസ്ഥയും
പന്തിന്റെ മോശം ഫോം ഈ സീസണില്‍ എല്‍എസ്ജിയുടെ പ്രകടനത്തെ കാര്യമായി ബാധിച്ചു. പ്രധാന ബൗളര്‍മാരുടെ പരിക്കുകളും ടീമിന് തിരിച്ചടിയായി. മൊഹ്സിന്‍ ഖാന്‍, മായങ്ക് യാദവ് തുടങ്ങിയ പ്രമുഖ താരങ്ങള്‍ക്ക് സീസണില്‍ ഭൂരിഭാഗം മത്സരങ്ങളും നഷ്ടമായി. ഇത് ടീമിന്റെ ബൗളിംഗ് ആക്രമണത്തെ ദുര്‍ബലപ്പെടുത്തി. മിച്ച് മാര്‍ഷ്, നിക്കോളാസ് പൂരന്‍, എയ്ഡന്‍ മാര്‍ക്രം തുടങ്ങിയ വിദേശ താരങ്ങളെയാണ് എല്‍എസ്ജി റണ്‍സിനായി പ്രധാനമായും ആശ്രയിച്ചത്.
ഐപിഎല്‍ ചരിത്രത്തിലെ ഏറ്റവും ഉയര്‍ന്ന പ്രതിഫലം വാങ്ങുന്ന കളിക്കാരിലൊരാളായിട്ടും, ഈ സീസണിലെ പന്തിന്റെ പ്രകടനം ചോദ്യചിഹ്നമാവുകയാണ്. ക്യാപ്റ്റന്‍ എന്ന നിലയിലും ബാറ്റ്സ്മാന്‍ എന്ന നിലയിലും അദ്ദേഹത്തിന് ടീമിനെ വിജയത്തിലേക്ക് നയിക്കാന്‍ സാധിച്ചില്ല. ഇത് വലിയ തോതിലുള്ള വിമര്‍ശനങ്ങള്‍ക്ക് വഴിവെച്ചു. എല്‍എസ്ജി പ്ലേഓഫ് റൗണ്ടില്‍ നിന്ന് പുറത്തായ സാഹചര്യത്തില്‍, ശേഷിക്കുന്ന മത്സരങ്ങളില്‍ പന്തിന് മികവ് തെളിയിക്കേണ്ടത് അത്യാവശ്യമാണ്. അടുത്ത സീസണില്‍ അദ്ദേഹത്തിന്റെ ടീമിലെ ഭാവിയെക്കുറിച്ച് അന്തിമ തീരുമാനമെടുക്കാന്‍ ഇനിയും സമയമുണ്ടെങ്കിലും, നിലവിലെ അവസ്ഥ ആശങ്കാജനകമാണ്.
