രോഹിത് സ്വയം തെരഞ്ഞെടുത്ത വിധി, പരിഹാരം ഒന്നേയുളളു, തുറന്നടിച്ച് പൂജാര
ഇന്ത്യന്‍ ക്രിക്കറ്റ് ടീമിന്റെ നായകന്‍ രോഹിത് ശര്‍മയുടെ മോശം ഫോം ഇന്ത്യന്‍ ക്രിക്കറ്റ് ലോകത്ത് വലിയ ആശങ്ക ഉയര്‍ത്തുന്ന സാഹചര്യമാണ് നിലവിലുളളത്. ബോര്‍ഡര്‍-ഗവാസ്‌കര്‍ ട്രോഫിയില്‍ രോഹിത്തിന്റെ ബാറ്റ് നിശ്ചലമായിരിക്കുകയാണ്. ഈ സാഹചര്യത്തെക്കുറിച്ച് മുന്‍ ഇന്ത്യന്‍ താരം ചേതേശ്വര്‍ പൂജാര തന്റെ അഭിപ്രായം പങ്കുവെച്ചു.
ഓപ്പണിംഗ് സ്ഥാനത്തുനിന്ന് മധ്യനിരയിലേക്ക് മാറിയത് രോഹിത്തിന്റെ ബാറ്റിംഗ് താളം തകര്‍ത്തതായി പൂജാര വിലയിരുത്തുന്നു.
'അത് ഡ്രൈവ് ചെയ്യാന്‍ പറ്റിയ ലെങ്ത് അല്ലായിരുന്നു. ഒരു ഫുള്ളര്‍ ലെങ്ത് പന്തുകൂടി ഡ്രൈവ് ചെയ്യാന്‍ പ്രയാസമാണ് എന്ന് നമ്മള്‍ കണ്ടിട്ടുണ്ട്. അദ്ദേഹം ആ പന്ത് പഞ്ചില്‍ അടിക്കാന്‍ ശ്രമിച്ചു. പന്തിനെ നേരിടുന്നതിനു പകരം അതിനെ വെറുതെ വിടണം എന്നാണ് ഞാന്‍ കരുതുന്നത്. റണ്‍സൊന്നും എടുക്കാത്തത് അദ്ദേഹത്തിന് സമ്മര്‍ദ്ദം സൃഷ്ടിക്കുന്നുണ്ട്' പുജാര സ്റ്റാര്‍ സ്‌പോര്‍ട്‌സ് ഷോയില്‍ പറഞ്ഞു.
'അദ്ദേഹം ഇതുവരെ ഓപ്പണറായിരുന്നു, ഇപ്പോള്‍ ആറാം നമ്പറില്‍ ബാറ്റ് ചെയ്യുകയാണ്. അത് ടീമിനു വേണ്ടിയാണ്, പക്ഷേ ഓപ്പണറായി ബാറ്റ് ചെയ്യുമ്പോള്‍ കിട്ടുന്ന മൊമെന്റം ആറാം നമ്പറില്‍ രോഹിത്തിന് കിട്ടില്ല. അതുകൊണ്ട് ഫോം നിലനിര്‍ത്താന്‍ പാടുപെടുകയാണ്' പൂജാര കൂട്ടിച്ചേര്‍ത്തു.
ഒരു കാലത്ത് ഇന്ത്യന്‍ ഇന്നിംഗ്‌സിന്റെ പിടിപ്പാടിന്റെ പ്രതീകമായിരുന്ന രോഹിത് ഇപ്പോള്‍ സ്ഥിരതയില്ലാത്ത പ്രകടനമാണ് കാഴ്ചവെക്കുന്നത്. ഈ പരമ്പരയിലെ രോഹിത്തിന്റെ പ്രകടനം വളരെ നിരാശാജനകമായിരുന്നു. പ്രത്യേകിച്ചും ബ്രിസ്‌ബേന്‍ ടെസ്റ്റിലെ അദ്ദേഹത്തിന്റെ ഇന്നിംഗ്‌സ്. 27 പന്തില്‍ 10 റണ്‍സ് മാത്രമാണ് രോഹിത്തിന് നേടാനായത്. ന്യൂസീലന്‍ഡിനെതിരായ പരമ്പരയിലും ഇതേ സ്ഥിതി തന്നെയായിരുന്നു.
രോഹിത് ശര്‍മ ഇന്ത്യന്‍ ക്രിക്കറ്റിന്റെ അനിവാര്യ ഘടകമാണ്. അദ്ദേഹത്തിന്റെ മടങ്ങിയെത്തല്‍ ടീമിന് അനിവാര്യമാണ്. എന്നാല്‍, ഇപ്പോഴത്തെ ഫോം നിലനിര്‍ത്തിയാല്‍ ടീമില്‍ നിന്ന് പുറത്താക്കപ്പെടേണ്ടി വന്നേക്കാം എന്ന ആശങ്കയും ഉയര്‍ന്നുവരുന്നു.
