എല്ലാ റൂമറുകളും തള്ളി, നിര്‍ണ്ണായക തീരുമാനം പ്രഖ്യാപിച്ച് രോഹിത്ത്
ചാമ്പ്യന്‍സ് ട്രോഫി ഫൈനലില്‍ ന്യൂസിലന്‍ഡിനെ തോല്‍പിച്ച് ഇന്ത്യയെ കിരീടത്തിലേക്ക് നയിച്ച് ക്യാപ്റ്റന്‍ രോഹിത് ശര്‍മ്മ ചരിത്രത്തില്‍ ഇടം നേടി. രോഹിത്തിന്റെ നേതൃത്വത്തിലുള്ള ഇന്ത്യ ടൂര്‍ണമെന്റില്‍ തോല്‍വിയറിയാതെയാണ് കിരീടം ചൂടി. ടൂര്‍ണമെന്റില്‍ ഫൈനലില്‍ ഉള്‍പ്പെടെ ന്യൂസിലന്‍ഡിനെ രണ്ടുതവണ തോല്‍പ്പിച്ചു.
ഫൈനലില്‍ രോഹിത് തന്റെ മികച്ച പ്രകടനം പുറത്തെടുത്തു. ഫൈനലില്‍ 83 പന്തില്‍ 76 റണ്‍സാണ് രോഹിത് നേടിയത്. കളിയിലെ താരവും രോഹിത്തായിരുന്നു.
ഫൈനലില്‍ രോഹിത് വിജയകരമായ ഇന്നിംഗ്‌സ് കളിക്കുമ്പോള്‍ തന്നെ രോഹിത്ത് ഏകദിന ക്രിക്കറ്റില്‍ നിന്ന് വിരമിക്കുന്നു എന്ന അഭ്യൂഹങ്ങള്‍ പ്രചരിച്ചിരുന്നു. 2024-ലെ ലോകകപ്പില്‍ ഇന്ത്യയെ കിരീടത്തിലേക്ക് നയിച്ച ശേഷം ടി20 അന്താരാഷ്ട്ര ക്രിക്കറ്റില്‍ നിന്ന് രോഹിത് വിരമിച്ചിരുന്നു. ചാമ്പ്യന്‍സ് ട്രോഫി നേടിയതിന് ശേഷം രോഹിത് സമാനമായ തീരുമാനം എടുക്കുമെന്ന് പല ആരാധകരും പ്രതീക്ഷിച്ചു.
എന്നാല്‍ രോഹിത് ഏകദിനത്തില്‍ നിന്ന് വിരമിക്കാന്‍ പദ്ധതിയിടുന്നില്ല. ഫൈനലിന് ശേഷം മാധ്യമങ്ങളോട് സംസാരിച്ച രോഹിത്, ഏകദിനത്തില്‍ നിന്ന് വിരമിക്കുന്നില്ലെന്ന് സ്ഥിരീകരിച്ചു. 'ഭാവി പദ്ധതികള്‍ ഭാവിയില്‍ വരും. ഇപ്പോള്‍ എല്ലാം പഴയതുപോലെ തുടരും,' ഇന്ത്യന്‍ ക്യാപ്റ്റന്‍ പറഞ്ഞു.
ഓസ്ട്രേലിയയില്‍ ബാറ്റിംഗില്‍ രോഹിത്തിന്റെ മോശം ഫോം കാരണം ടെസ്റ്റ് ടീമിലെ അദ്ദേഹത്തിന്റെ സ്ഥാനം ഇപ്പോഴും സംശയത്തിലാണ്. ഓസ്ട്രേലിയന്‍ പര്യടനത്തിലെ അഞ്ചാം ടെസ്റ്റ് മത്സരത്തില്‍ നിന്ന് അദ്ദേഹം പിന്മാറിയതും ശ്രദ്ധേയമാണ്. ടെസ്റ്റ് ടീമില്‍ തിരഞ്ഞെടുക്കപ്പെടുന്നില്ലെങ്കില്‍, 2025 ഓഗസ്റ്റില്‍ ബംഗ്ലാദേശ് പര്യടനത്തിലാകും രോഹിത് ഇന്ത്യക്കായി അടുത്ത മത്സരം കളിക്കുക.
രോഹിത്തിന് ഇപ്പോള്‍ ചെറിയൊരു വിശ്രമമുണ്ട്, അടുത്തതായി 2025 ഐപിഎല്ലിലാകും അദ്ദേഹത്തെ കാണാന്‍ കഴിയുക. ഹാര്‍ദിക് പാണ്ഡ്യയുടെ ക്യാപ്റ്റന്‍സിക്ക് കീഴില്‍ മുംബൈ ഇന്ത്യന്‍സിനായി രോഹിത് കളിക്കുന്നത് തുടരും.
രവീന്ദ്ര ജഡേജയും വിരമിക്കുന്നില്ല
രവീന്ദ്ര ജഡേജ ഏകദിനത്തില്‍ നിന്ന് വിരമിച്ചേക്കുമെന്നും അഭ്യൂഹങ്ങളുണ്ടായിരുന്നു. എന്നാല്‍ അതും സംഭവിക്കുന്നില്ല. കിരീടം നേടിയ ശേഷം ഹര്‍ഷ ഭോഗ്ലെയോട് സംസാരിച്ച ജഡേജ വിരമിക്കലിനെക്കുറിച്ച് സൂചനകളൊന്നും നല്‍കിയില്ല.
2027-ലെ ഏകദിന ലോകകപ്പ് നേടാന്‍ ഇന്ത്യന്‍ താരങ്ങള്‍ ആഗ്രഹിക്കുന്നു, അടുത്ത 50 ഓവര്‍ ഐസിസി ഇവന്റില്‍ നിരവധി സീനിയര്‍ താരങ്ങള്‍ കളിക്കാനുണ്ടാകും. 2019 ഏകദിന ലോകകപ്പ് ഫൈനലില്‍ രോഹിത്തിന്റെ നേതൃത്വത്തിലുള്ള ഇന്ത്യ ഓസ്ട്രേലിയയോട് പരാജയപ്പെട്ടിരുന്നു.