ഇന്ത്യയുടെ നമ്പര്‍ വണ്‍ ബൗളര്‍ക്ക് പന്ത് കൊടുത്തില്ല, രോഹിത്തിനെതിരെ ആഞ്ഞടിച്ച് ഇന്ത്യന്‍ താരം
ന്യൂസിലന്‍ഡിനെതിരായ ആദ്യ ടെസ്റ്റിലെ പരാജയത്തിന് പിന്നാലെ ഇന്ത്യന്‍ ക്യാപ്റ്റന്‍ രോഹിത് ശര്‍മ്മയ്ക്കെതിരെ രൂക്ഷവിമര്‍ശനവുമായി മുന്‍ ഇന്ത്യന്‍ താരം ആകാശ് ചോപ്ര രംഗത്തെത്തി. മത്സരത്തിന്റെ രണ്ടാം ഇന്നിങ്സില്‍ രവിചന്ദ്രന്‍ അശ്വിന് പന്ത് നല്‍കാതിരുന്നതാണ് വിമര്‍ശനത്തിന് കാരണം.
ന്യൂസിലന്‍ഡിന് ജയിക്കാന്‍ 107 റണ്‍സ് മാത്രം മതിയായിരുന്ന സാഹചര്യത്തില്‍ അശ്വിന് രണ്ട് ഓവറുകള്‍ മാത്രമാണ് ബൗള്‍ ചെയ്യാന്‍ അവസരം ലഭിച്ചത്. ടെസ്റ്റ് ക്രിക്കറ്റിലെ ഒന്നാം നമ്പര്‍ ബൗളറെ ഇങ്ങനെ അവഗണിച്ചത് രോഹിതിന്റെ വലിയ പിഴവാണെന്ന് ചോപ്ര അഭിപ്രായപ്പെട്ടു.
'അശ്വിന് ഇന്ത്യയെ വിജയിപ്പിക്കുമെന്ന് ഞാന്‍ പറയുന്നില്ല. പക്ഷേ അദ്ദേഹത്തിന് അര്‍ഹമായ സമയത്ത് പന്ത് നല്‍കാതിരുന്നത് വലിയ തെറ്റാണ്,' ചോപ്ര പറഞ്ഞു.
ഇടംകൈയ്യന്‍ ബാറ്റ്‌സ്മാന്‍മാര്‍ ക്രീസിലുള്ളപ്പോഴും അശ്വിനെ ബൗളിംഗില്‍ നിന്ന് മാറ്റിനിര്‍ത്തിയത് ചോപ്ര ചോദ്യം ചെയ്തു. ടെസ്റ്റ് ക്രിക്കറ്റില്‍ ഇന്ത്യയ്ക്ക് വേണ്ടി ഏറ്റവും കൂടുതല്‍ വിക്കറ്റ് നേടിയ ബൗളറെ ഇങ്ങനെ അവഗണിക്കുന്നതിന് ന്യായീകരണമില്ലെന്നും അദ്ദേഹം കൂട്ടിച്ചേര്‍ത്തു.
രണ്ടാം ഇന്നിങ്സിലെ 25-ാം ഓവറിലാണ് രോഹിത് അശ്വിന് പന്ത് നല്‍കിയത്. അപ്പോഴേക്കും ന്യൂസിലന്‍ഡിന് ജയിക്കാന്‍ വേണ്ടിയിരുന്നത് 10 റണ്‍സ് മാത്രമായിരുന്നു. അശ്വിന് തന്റെ രണ്ട് ഓവറുകളില്‍ വെറും ആറ് റണ്‍സ് മാത്രമാണ് വഴങ്ങിയത്.
നിലവില്‍ അശ്വിന് പരിക്കേറ്റിട്ടുണ്ടെന്ന റിപ്പോര്‍ട്ടുകളുണ്ട്. രണ്ടാം ടെസ്റ്റില്‍ അദ്ദേഹം കളിക്കുമോ എന്ന കാര്യത്തില്‍ വ്യക്തതയില്ല.
