രോഹിത് ഓസ്‌ട്രേലിയയിലേക്കില്ല; ഭുമ്ര നയിക്കും ടീം ഇന്ത്യയെ.. ഹിറ്റ്മാന് പകരം സർപ്രൈസ് ബാറ്സ്മാൻ ടീമിലെത്തും
ഇന്ത്യൻ ക്യാപ്റ്റൻ രോഹിത് ശർമ്മ വെള്ളിയാഴ്ച പെർത്തിൽ ആരംഭിക്കുന്ന ഓസ്‌ട്രേലിയയ്‌ക്കെതിരായ ബോർഡർ-ഗവാസ്‌കർ ട്രോഫിയിലെ ആദ്യ ടെസ്റ്റ് കളിക്കില്ല. ഈ ആഴ്ച ആദ്യം രണ്ടാമത്തെ കുട്ടി ജനിച്ചതിനെ തുടർന്ന് ഭാര്യയ്‌ക്കൊപ്പം കൂടുതൽ സമയം വേണമെന്ന് അദ്ദേഹം ബിസിസിഐയെ അറിയിച്ചു. ടീമിന്റെ വൈസ് ക്യാപ്റ്റനായ പേസ് ബൗളർ ജസ്പ്രീത് ബുംറ രോഹിതിന്റെ അഭാവത്തിൽ ക്യാപ്റ്റൻ സ്ഥാനം ഏറ്റെടുക്കും. ഡിസംബർ 6 ന് അഡ്‌ലെയ്ഡിൽ ആരംഭിക്കുന്ന പിങ്ക് ബോൾ ടെസ്റ്റായ രണ്ടാം മത്സരത്തിൽ രോഹിത് കളിക്കുമെന്നാണ് പ്രതീക്ഷ.
രോഹിതിന്റെ അഭാവത്തിൽ, ഇന്ത്യ എ ടീമിനൊപ്പം പര്യടനം നടത്തിയ ദേവ്ദത്ത് പടിക്കലിനോട് ഓസ്‌ട്രേലിയയിൽ തുടരാൻ സെലക്ടർമാർ ആവശ്യപ്പെട്ടു. പെർത്തിലെ ഒപസ് സ്റ്റേഡിയത്തിൽ നടക്കുന്ന ആദ്യ ടെസ്റ്റ് മത്സരത്തിനായി രോഹിതിന് പകരം പടിക്കൽ 18 അംഗ ടീമിൽ ഉൾപ്പെടും.
"അദ്ദേഹം (രോഹിത്) യാത്ര ചെയ്യുമെന്ന് ഞങ്ങൾ പ്രതീക്ഷിച്ചിരുന്നു, പക്ഷേ അദ്ദേഹത്തിന് ഇപ്പോൾ പോകാൻ കഴിയില്ലെന്നും കുറച്ചുകൂടി സമയം ആവശ്യമാണെന്നും ബിസിസിഐയെ അറിയിച്ചു. അഡ്‌ലെയ്ഡിൽ നടക്കുന്ന രണ്ടാം മത്സരമായ പിങ്ക് ബോൾ ടെസ്റ്റ് മത്സരത്തിനായി അദ്ദേഹം ഓസ്‌ട്രേലിയയിലേക്ക് പറക്കും. ആദ്യ ടെസ്റ്റിനും രണ്ടാം ടെസ്റ്റിനും ഇടയിൽ ഒമ്പത് ദിവസത്തെ ഇടവേളയുണ്ട്. അതിനാൽ രോഹിത് കൃത്യസമയത്ത് ഓസ്‌ട്രേലിയയിൽ എത്തുമെന്നാണ് പ്രതീക്ഷിക്കുന്നത്." ഒരു ബിസിസിഐ ഉദ്യോഗസ്ഥൻ സ്ഥിരീകരിച്ചു.
പെർത്ത്, അഡ്‌ലെയ്ഡ്, ബ്രിസ്‌ബേൻ, മെൽബൺ, സിഡ്‌നി എന്നിവിടങ്ങളിലാണ് ടെസ്റ്റ് പരമ്പര നടക്കുന്നത്. ആദ്യ ടെസ്റ്റിനായി ക്യാപ്റ്റൻ രോഹിത് ഓസ്‌ട്രേലിയയിലേക്ക് യാത്ര ചെയ്യുമെന്ന് സീനിയർ സെലക്ഷൻ കമ്മിറ്റി പ്രതീക്ഷിച്ചിരുന്നു. ഗംഭീറിന്റെയും, രോഹിതിന്റെയും നേതൃത്വത്തിൽ ന്യൂസിലൻഡിനോട് സ്വന്തം നാട്ടിൽ 0-3ന് വൈറ്റ്‌വാഷ് നേരിട്ട ടീമിന്, ഓസ്‌ട്രേലിയയിലെ ടെസ്റ്റ് പര്യടനം ഒരു ലിറ്റ്മസ് ടെസ്റ്റായിരിക്കും. മോശം ഫോമും ബാറ്റിംഗ് പരാജയവുമാണ് ടീം നേരിടുന്ന വെല്ലുവിളി.
കെ എൽ രാഹുൽ കളിക്കാൻ സാധ്യത, ധ്രുവ് ജുറേലിനും അവസരം ലഭിക്കും
ശനിയാഴ്ച മാച്ച് സിമുലേഷൻ സമയത്ത് ഫീൽഡിംഗ് ചെയ്യുമ്പോൾ ശുഭ്മാൻ ഗില്ലിന് തള്ളവിരലിന് പരിക്കേറ്റതിനെ തുടർന്ന് ഇന്ത്യയുടെ ബാറ്റിംഗ് നിരയിൽ തീർച്ചയായും മാറ്റങ്ങളുണ്ടാവും. ഗിൽ ആദ്യ ടെസ്റ്റ് കളിച്ചേക്കില്ല, പകരം കെ എൽ രാഹുൽ പ്ലേയിംഗ് ഇലവനിൽ ഇടം നേടും. രോഹിതിന്റെ അഭാവത്തിൽ, വിക്കറ്റ് കീപ്പർ ധ്രുവ് ജുറേലിന് ബാറ്റ്സ്മാൻ എന്ന നിലയിൽ ടീമിൽ അവസരം ലഭിച്ചേക്കാം. ഓസ്‌ട്രേലിയ എയ്‌ക്കെതിരായ ടൂർ ഗെയിമിൽ ജുറേൽ 80 ഉം 64 ഉം റൺസ് നേടി ഓസീസ് മണ്ണിൽ തന്റെ ബാറ്റിങ് മികവ് പ്രകടമാക്കിയിരുന്നു. സീരീസിൽ ക്രീസിൽ ഏറ്റവും ഉറച്ച ബാറ്റ്സ്മാനായി കാണപ്പെട്ടതും ജുറേൽ തന്നെയാണ്.
