രോഹത്തിന്റെ മുഖഭാവത്തില്‍ നിന്ന് എല്ലാം വ്യക്തം, ഇനി ചടങ്ങുകള്‍ മാത്രം
മുംബൈ: രഞ്ജി ട്രോഫിയിലേക്കുള്ള തിരിച്ചുവരവില്‍ ഇന്ത്യന്‍ ക്യാപ്റ്റന്‍ രോഹിത് ശര്‍മ്മയ്ക്ക് നിരാശാജനകമായ തുടക്കം. ജമ്മു കശ്മീരിനെതിരായ മത്സരത്തില്‍ വെറും മൂന്ന് റണ്‍സ് നേടി രോഹിത് പുറത്തായപ്പോള്‍ അദ്ദേഹത്തിന്റെ മുഖഭാവത്തില്‍ നിന്ന് എത്രത്തോളം താന്‍ നിരാശനാണെന്ന് എല്ലാം വ്യക്തമായിരുന്ന്ു.
ഓസ്‌ട്രേലിയക്കെതിരായ ടെസ്റ്റ് പരമ്പരയിലെ മോശം പ്രകടനത്തിന് ശേഷം ഫോം വീണ്ടെടുക്കാനാണ് രോഹിത് ആഭ്യന്തര ക്രിക്കറ്റിലേക്ക് തിരിച്ചെത്തിയത്. എന്നാല്‍ ജമ്മു പേസര്‍ ഉമര്‍ നസീര്‍ മിറിന്റെ പന്തില്‍ പുറത്താകുന്നതോടെ രോഹിത്തിന്റെ പ്രതീക്ഷകള്‍ അസ്തമിച്ചു.
ക്രീസില്‍ അസ്വസ്ഥനായി കാണപ്പെട്ട രോഹിത് നിരവധി പന്തുകള്‍ക്ക് കൃത്യമായി ബാറ്റ് ചെയ്യാന്‍ കഴിയാതെ വിഷമിച്ചു. ഫോമിലേക്ക് തിരിച്ചെത്താനുള്ള ആഗ്രഹത്തില്‍ അദ്ദേഹം ധാരാളം വൈഡ് പന്തുകള്‍ക്ക് പിന്നാലെ പോകുന്നതും കാണാന്‍ കഴിഞ്ഞു.
ഒടുവില്‍ 19 പന്തില്‍ നിന്ന് വെറും 3 റണ്‍സ് നേടിയ രോഹിത് പുറത്താകുമ്പോള്‍ അദ്ദേഹത്തിന്റെ മുഖത്ത് നിരാശയും അമ്പരപ്പും നിഴലിച്ചു. ഈ വീഡിയോ സമൂഹ മാധ്യമങ്ങളില്‍ വൈറലായിരിക്കുകയാണ്.
രോഹിത്തിന്റെ പുറത്താകലോടെ മുംബൈ ടീം തുടക്കത്തില്‍ തന്നെ 12/2 എന്ന നിലയിലായി. യശസ്വി ജയ്സ്വാളും (4) ഓപ്പണര്‍ എന്ന നിലയില്‍ വേഗത്തില്‍ പുറത്തായി. മത്സരത്തില്‍ മുംബൈ വെറും 120 റണ്‍സിന് പുറത്താകുകയും ചെയ്തിരുന്നു.
അടുത്തിടെ ടെസ്റ്റ് ക്രിക്കറ്റില്‍ മോശം ഫോമിലൂടെ കടന്നുപോകുന്ന രോഹിത് ഫോമിലേക്ക് തിരിച്ചെത്താനാണ് രഞ്ജി ട്രോഫിയില്‍ കളിക്കാന്‍ തീരുമാനിച്ചത്. ഫെബ്രുവരി 19 ന് ആരംഭിക്കുന്ന ഐസിസി ചാമ്പ്യന്‍സ് ട്രോഫിക്ക് മുന്നോടിയായി ഫോം വീണ്ടെടുക്കുക എന്നതാണ് രോഹിത്തിന്റെ ലക്ഷ്യം.
