സഞ്ജുവിന് നാട്ടില്‍ ഹീറോയിക്ക് സ്വീകരണം, പ്രത്യേക സമ്മാനവുമായി ശശി തരൂര്‍
ബംഗ്ലാദേശിനെതിരായ ടി20 പരമ്പരയിലെ തകര്‍പ്പന്‍ പ്രകടനത്തിന് ശേഷം സഞ്ജു സാംസണ്‍ നാട്ടിലെത്തി. കേരളത്തിലെത്തിയ താരത്തിന് ആരാധകര്‍ ഉജ്ജ്വല സ്വീകരണമാണ് നല്‍കിയത്. സഞ്ജുവിന്റെ മൂന്നാം ടി20 സെഞ്ച്വറി ആരാധകഹൃദയങ്ങളെ ത്രസിപ്പിച്ചിരുന്നു.
തിരുവനന്തപുരം വിമാനത്താവളത്തില്‍ എത്തിയ സഞ്ജുവിനെ ആരാധകര്‍ പൂക്കളും പടക്കങ്ങളുമായി സ്വീകരിച്ചു. തുടര്‍ന്ന് ശശി തരൂര്‍ എംപി സഞ്ജുവിനെ പൊന്നാട അണിയിച്ച് ആദരിച്ചു. നീല പൊന്നാടയണിയിച്ചുള്ള ചിത്രങ്ങള്‍ ശശി തരൂര്‍ സമൂഹമാധ്യമങ്ങളില്‍ പങ്കുവച്ചിട്ടുണ്ട്. സഞ്ജുവിന്റെ കടുത്ത ആരാധകനായ തരൂര്‍ എപ്പോഴും താരത്തിന് പിന്തുണയുമായി രംഗത്തെത്താറുണ്ട്.
ഇനി എന്ത്?
ബംഗ്ലാദേശ് പരമ്പരക്ക് ശേഷം ഇന്ത്യ ന്യൂസിലന്‍ഡിനെതിരെ മൂന്ന് മത്സര ടെസ്റ്റ് പരമ്പര കളിക്കാനിരിക്കുകയാണ്. തുടര്‍ന്ന് ദക്ഷിണാഫ്രിക്കയ്‌ക്കെതിരെ മൂന്ന് ടി20യും ഏകദിനവും നടക്കും. ദക്ഷിണാഫ്രിക്കന്‍ ടി20 പരമ്പരയില്‍ സഞ്ജുവിന് ഇടം ലഭിക്കുമോ എന്നാണ് ആരാധകര്‍ ഉറ്റുനോക്കുന്നത്. ബംഗ്ലാദേശിനെതിരെ സ്‌പെഷ്യലിസ്റ്റ് ഓപ്പണര്‍മാരുടെ അഭാവത്തിലാണ് സഞ്ജുവിന് അവസരം ലഭിച്ചത്. വിശ്രമത്തിലായിരുന്ന താരങ്ങള്‍ തിരിച്ചെത്തുന്നതോടെ സഞ്ജുവിന് ഓപ്പണര്‍ സ്ഥാനം നഷ്ടമായേക്കാം.
രഞ്ജി ട്രോഫിയില്‍ കളിക്കുമോ?
രഞ്ജി ട്രോഫിയില്‍ കേരള ടീമിനൊപ്പം ചേരണമെന്ന് സഞ്ജുവിനോട് ഒരു വിഭാഗം ആരാധകര്‍ ആവശ്യപ്പെടുന്നുണ്ട്. എന്നാല്‍ ദക്ഷിണാഫ്രിക്കന്‍ പരമ്പരയ്ക്ക് മുന്‍പ് പരിക്കേല്‍ക്കാതിരിക്കാന്‍ സഞ്ജു രഞ്ജിയില്‍ കളിക്കാന്‍ സാധ്യതയില്ല.
കരിയറിലെ വഴിത്തിരിവ്
ഒന്‍പത് വര്‍ഷത്തെ അന്താരാഷ്ട്ര കരിയറില്‍ സഞ്ജുവിന് ഇതുവരെ സ്ഥിരതയോടെ തിളങ്ങാന്‍ സാധിച്ചിരുന്നില്ല. എന്നാല്‍ ബംഗ്ലാദേശിനെതിരായ സെഞ്ച്വറി കരിയറിലെ വഴിത്തിരിവാകുമെന്നാണ് പ്രതീക്ഷ. ഈ പ്രകടനം തുടര്‍ന്നാല്‍ ഇന്ത്യന്‍ ടീമില്‍ ഇടം നേടാനും സഞ്ജുവിന് സാധിക്കും.
