ചരിത്രനേട്ടം തൊട്ടടുത്ത്, ഐപിഎല്ലില്‍ ഗര്‍ജിക്കാന്‍ സഞ്ജു
രാജസ്ഥാന്‍ റോയല്‍സിന്റെ ആരാധകര്‍ക്ക് സന്തോഷവാര്‍ത്ത. പരിക്കിനെ തുടര്‍ന്ന് ആദ്യ മൂന്ന് മത്സരങ്ങളില്‍ ഇമ്പാക്ട് പ്ലെയറായി മാത്രം കളിച്ച മലയാളി താരം സഞ്ജു സാംസണ്‍ ഇന്ന് പഞ്ചാബ് കിംഗ്സിനെതിരെ നടക്കുന്ന മത്സരത്തില്‍ ടീമിനെ നയിക്കും. സഞ്ജുവിന്റെ നായകസ്ഥാനത്തേക്കുള്ള തിരിച്ചുവരവ് ടീമിന് പുതിയ ഊര്‍ജ്ജം നല്‍കുമെന്നാണ് പ്രതീക്ഷ.
വോണിന്റെ റെക്കോര്‍ഡ് മറികടക്കാന്‍ സഞ്ജുവിന് സുവര്‍ണ്ണാവസരം
ഇന്ന് സഞ്ജുവിന് മുന്നിലുള്ളത് രാജസ്ഥാന്‍ റോയല്‍സിന്റെ ചരിത്രത്തിലെ ഏറ്റവും മികച്ച ക്യാപ്റ്റന്‍ എന്ന നേട്ടത്തിലേക്ക് എത്താനുള്ള സുവര്‍ണ്ണാവസരമാണ്. നിലവില്‍, റോയല്‍സിന്റെ ക്യാപ്റ്റന്‍ എന്ന നിലയില്‍ ഏറ്റവുമധികം മത്സരങ്ങളില്‍ വിജയിച്ചവരുടെ പട്ടികയില്‍ ഷെയ്ന്‍ വോണിനൊപ്പം (31 വിജയങ്ങള്‍) സഞ്ജു തുല്യനിലയിലാണ്. പഞ്ചാബിനെതിരെ ഇന്ന് ഒരു വിജയം നേടിയാല്‍ സഞ്ജു 32 വിജയങ്ങളുമായി വോണിനെ മറികടന്ന് ഈ നേട്ടം സ്വന്തമാക്കുന്ന താരമാകും.
പരിക്കിന് ശേഷം തിരിച്ചെത്തി; കളിക്കാന്‍ പൂര്‍ണ്ണമായും ഫിറ്റാണെന്ന് സഞ്ജു
വിരലിനേറ്റ പരിക്കിന് ശസ്ത്രക്രിയയ്ക്ക് ശേഷം ദേശീയ ക്രിക്കറ്റ് അക്കാദമി സഞ്ജുവിന് വിക്കറ്റ് കീപ്പറായും ക്യാപ്റ്റനായും കളിക്കാന്‍ അനുമതി നല്‍കിയിട്ടുണ്ട്. തിരിച്ചുവരവിനെക്കുറിച്ച് സഞ്ജു പറയുന്നത് ഇങ്ങനെ:
'സത്യം പറഞ്ഞാല്‍, ഞാന്‍ അല്‍പ്പം അത്ഭുതപ്പെട്ടു. മൂന്ന് മത്സരങ്ങള്‍ മാത്രമേ നഷ്ടമാകൂ എന്ന് കരുതിയതിനാല്‍ അത് പെട്ടെന്ന് കടന്നുപോകുമെന്ന് വിചാരിച്ചു. പക്ഷേ മൂന്ന് മത്സരങ്ങള്‍ നഷ്ടമായപ്പോള്‍, ഞാന്‍ സ്വയം നിയന്ത്രിക്കുകയും കളിയെ വ്യത്യസ്തമായ ഒരു കാഴ്ചപ്പാടില്‍ നിന്ന് കാണുകയും ചെയ്തു. ഡഗ്-ഔട്ടിലിരുന്ന് എന്റെ സഹോദരന്മാര്‍ പോരാടുന്നത് കാണുന്നത് ഒരു പുതിയ അനുഭവമായിരുന്നു. തിരിച്ചെത്തിയതിലും വിക്കറ്റ് കീപ്പറാകാനും ബാറ്റ് ചെയ്യാനും പൂര്‍ണ്ണമായും ഫിറ്റായതിലും ഞാന്‍ വളരെ ആവേശത്തിലാണ്'
പഞ്ചാബ് പരീക്ഷയ്ക്ക് രാജസ്ഥാന്‍
സഞ്ജു ഇല്ലാത്ത ആദ്യ മൂന്ന് മത്സരങ്ങളില്‍ റിയാന്‍ പരാഗാണ് രാജസ്ഥാനെ നയിച്ചത്. ഈ മത്സരങ്ങളില്‍ ടീം സമ്മിശ്ര പ്രകടനമാണ് കാഴ്ചവെച്ചത്. ആദ്യ രണ്ട് മത്സരങ്ങളില്‍ സണ്‍റൈസേഴ്‌സ് ഹൈദരാബാദിനോടും കൊല്‍ക്കത്ത നൈറ്റ് റൈഡേഴ്‌സിനോടും യഥാക്രമം 44 റണ്‍സിനും എട്ട് വിക്കറ്റിനും പരാജയപ്പെട്ടെങ്കിലും, അവസാന മത്സരത്തില്‍ ഗുവാഹത്തിയില്‍ ചെന്നൈ സൂപ്പര്‍ കിംഗ്സിനെതിരെ ആറ് റണ്‍സിന് വിജയിക്കാന്‍ അവര്‍ക്ക് സാധിച്ചു.
ഇന്ന് മികച്ച ഫോമിലുള്ള പഞ്ചാബ് കിംഗ്സിനെതിരെ കളിക്കുമ്പോള്‍ വിജയം അത്ര എളുപ്പമാകില്ല. എങ്കിലും സഞ്ജുവിന്റെ തിരിച്ചുവരവ് ടീമിന്റെ ആത്മവിശ്വാസം വര്‍ദ്ധിപ്പിക്കുമെന്നും ചരിത്രനേട്ടം സ്വന്തമാക്കാന്‍ സാധിക്കുമെന്നും ആരാധകര്‍ പ്രതീക്ഷിക്കുന്നു.
