സഞ്ജുവിന്റെ ഫിറ്റ്നസ്, ആശങ്കയില്‍ രാജസ്ഥാന്, എന്‍.സി.എ തീരുമാനം നിര്‍ണായകം
ഐപിഎല്‍ 18ാം സീസണ്‍ ആരംഭിക്കാനിരിക്കെ രാജസ്ഥാന് റോയല്‍സ് ക്യാപ്റ്റന്‍ സഞ്ജു സാംസണിന്റെ ഫിറ്റ്നസ് സംബന്ധിച്ച് ആശങ്കയിലാണ് ടീം. കഴിഞ്ഞ മാസം ഇംഗ്ലണ്ടിനെതിരായ പരമ്പരയ്ക്കിടെ വലതുകൈവിരലിന് പരിക്കേറ്റതിനെ തുടര്‍ന്ന് അടുത്തിടെ ശസ്ത്രക്രിയയ്ക്ക് വിധേയനായ സഞ്ജു പൂര്‍ണമായും സുഖം പ്രാപിച്ചെങ്കിലും, വിക്കറ്റ് കീപ്പിംഗില്‍ അദ്ദേഹത്തിന്റെ പ്രകടനത്തെക്കുറിച്ച് ആശങ്കകള്‍ നിലനില്‍ക്കുന്നു.
എന്‍.സി.എയുടെ നിര്‍ണായക പരിശോധന
- സീസണ്‍ അടുക്കുമ്പോള്‍, സാംസണിന്റെ ഫിറ്റ്നസ് വിലയിരുത്തുന്നതിനായി നാഷണല്‍ ക്രിക്കറ്റ് അക്കാദമി (എന്‍സിഎ) കൂടുതല്‍ പരിശോധനകള്‍ നടത്താന്‍ ഒരുങ്ങുകയാണ്. സഞ്ജു കീപ്പിംഗില്‍ ബെംഗളൂരു ദേശീയ ക്രിക്കറ്റ് അക്കാദമിയുടെ തീരുമാനത്തിനായി കാത്തിരിക്കുകയാണ്. ഇതോടെ സീസണിലെ തുടക്കത്തിലെ മത്സരങ്ങളില്‍ സഞ്ജു വിക്കറ്റ് കീപ്പിംഗ് ഏറ്റെടുക്കില്ലെന്നാണ് സൂചന. കീപ്പിംഗില്‍ സഞ്ജുവിന് കൂടുതല്‍ ടെസ്റ്റുകളുണ്ടെന്നാണ് റിപ്പോര്‍ട്ട്.
രാജസ്ഥാന് ആശങ്കയില്ല
ഇന്ത്യന്‍ യുവ വിക്കറ്റ് കീപ്പര്‍ ധ്രുവ് ജൂറലിനെ രാജസ്ഥാന് റോയല്‍സ് ടീമില്‍ നിലനിര്‍ത്തിയിരുന്നതിനാല്‍ രാജസ്ഥാന് മറ്റ് ആശങ്കകളില്ല. നിലവില്‍ രാജ്യത്തെ ഏറ്റവും മികച്ച വിക്കറ്റ് കീപ്പര്‍മാരില്‍ ഒരാളാണ് ജൂറല്‍. ഈ സീസണില്‍ വിക്കറ്റ് കീപ്പറായി കളിക്കാന്‍ സഞ്ജുവിന് സാധിച്ചില്ലെങ്കിലും രാജസ്ഥാനെ അത് ഒരു തരത്തിലും ബാധിക്കില്ല. രാജസ്ഥാന് റോയല്‍സ് മാര്‍ച്ച് 23 നാണ് തങ്ങളുടെ ആദ്യ മത്സരത്തിന് ഇറങ്ങുക.
സഞ്ജുവിന് നിര്‍ണായകം
ഇന്ത്യയുടെ ട്വന്റി 20 ടീമില്‍ ഓപ്പണറായി സ്ഥിരപ്പെട്ട ശേഷമുള്ള സഞ്ജുവിന്റെ ആദ്യ ഐപിഎല്‍ സീസണാണിത്. ടീമില്‍ സ്ഥാനമുറപ്പിക്കാന്‍ മിന്നും പ്രകടനം നടത്തിയേ തീരു. ഇംഗ്ലണ്ടിനെതിരായ ട്വന്റി 20 പരമ്പരയിലെ മോശം ഫോം തീര്‍ക്കാന്‍ പോന്നൊരു സീസണ്‍ പ്രതീക്ഷിക്കുകയാണ് ആരാധകര്‍. എല്ലാ തവണയും തുടക്കത്തില്‍ മിന്നിത്തിളങ്ങുന്നി പിന്നീട് മോശം പ്രകടനം പുറത്തെടുക്കുന്ന പതിവ് ഇക്കുറി താരം മറികടക്കുമെന്നും ആരാധകര്‍ പ്രതീക്ഷിക്കുന്നു.
പരിക്കിന്റെ തുടക്കം
ജനുവരിയില്‍ ഇംഗ്ലണ്ടിനെതിരായ ട്വന്റി 20 പരമ്പരയിലെ അവസാന മത്സരത്തിലാണ് സഞ്ജുവിന് പരിക്കേറ്റത്. ഇംഗ്ലീഷ് പേസര്‍ ജോഫ്ര ആര്‍ച്ചര്‍ എറിഞ്ഞ പന്ത് കൊണ്ട് താരത്തിന്റെ കൈക്ക് പൊട്ടലേറ്റിരുന്നു. പരിക്കേറ്റ കൈയുമായി ജോഫ്ര ആര്‍ച്ചറെ സിക്സറിന് പറത്തിയ ശേഷമാണ് സഞ്ജു സാംസണ്‍ പുറത്തായത്. ആദ്യം ബാറ്റ് ചെയ്ത ഇന്ത്യ ഫീല്‍ഡിംഗിന് ഇറങ്ങിയപ്പോള്‍ സഞ്ജു ഗ്രൗണ്ടില്‍ ഇറങ്ങിയുന്നില്ല. പകരം ജൂറേലാണ് വിക്കറ്റിന് പിന്നില്‍ നിന്നത്.