ബാബറിനെതിരെ കൊലയേറ് നടത്തി ദക്ഷിണാഫ്രിക്കന്‍ താരം, രൂക്ഷമായ ഏറ്റുമുട്ടല്‍
കേപ്പ് ടൗണില്‍ നടക്കുന്ന ദക്ഷിണാഫ്രിക്ക-പാകിസ്ഥാന്‍ രണ്ടാം ടെസ്റ്റിന്റെ മൂന്നാം ദിവസം പാകിസ്ഥാന്‍ ക്യാപ്റ്റന്‍ ബാബര്‍ അസമും ദക്ഷിണാഫ്രിക്കന്‍ ഓള്‍റൗണ്ടര്‍ വിയാന്‍ മുള്‍ഡറും തമ്മില്‍ വാക്കേറ്റമുണ്ടായി. ക്രിക്കറ്റ് ലോകത്ത് ഏറെ ശ്രദ്ധിക്കപ്പെടുന്ന കാഴ്ച്ചയായി ഇത് മാറി.
ആദ്യ ഇന്നിംഗ്‌സില്‍ 615 റണ്‍സ് നേടിയ ദക്ഷിണാഫ്രിക്കയ്ക്കെതിരെ 194 റണ്‍സിന് പുറത്തായ പാകിസ്ഥാനെ ഫോളോ ഓണ്‍ ചെയ്യിച്ചിരുന്നു. രണ്ടാം ഇന്നിംഗ്‌സില്‍ ഓപ്പണര്‍മാരായ ഷാന്‍ മസൂദും (102*) ബാബര്‍ അസമും (81) ചേര്‍ന്ന് 205 റണ്‍സിന്റെ റെക്കോര്‍ഡ് ഓപ്പണിംഗ് പാര്‍ട്ണര്‍ഷിപ്പ് നേടിയാണ് പാകിസ്ഥാന്‍ മൂന്നാം ദിവസത്തെ കളി അവസാനിപ്പിച്ചത്.
രണ്ടാം ഇന്നിംഗ്‌സില്‍ 32-ാം ഓവറിലാണ് സംഭവം. ബാബര്‍ മുന്നിലേക്ക് മുട്ടിയില്ല പന്ത് പിടിച്ചെടുത്ത മുള്‍ഡര്‍ ബാബറിന്റെ ദേഹം ലക്ഷ്യമാക്കി ആഞ്ഞെറിയുകയായിരുന്നു. പന്ത് സ്റ്റമ്പിലേക്കാണ് ലക്ഷ്യമിട്ടതെന്ന് മുള്‍ഡര്‍ അവകാശപ്പെട്ടെങ്കിലും, പന്ത് നേരെ ബാബറിന്റെ പാഡില്‍ തട്ടി. ഇതേത്തുടര്‍ന്ന് ഇരുവരും തമ്മില്‍ രൂക്ഷമായ വാക്കേറ്റമുണ്ടാവുകയും അമ്പയര്‍മാര്‍ ഇടപെട്ട് പ്രശ്‌നം പരിഹരിക്കുകയുമായിരുന്നു.
81 റണ്‍സിന് പുറത്തായ ബാബറിന് സെഞ്ച്വറി നേടാനായില്ല. 2023 ഓഗസ്റ്റ് മുതല്‍ ടെസ്റ്റ് ക്രിക്കറ്റില്‍ സെഞ്ച്വറി നേടാന്‍ ബാബറിന് കഴിഞ്ഞിട്ടില്ല. രണ്ട് ഇന്നിംഗ്‌സുകളിലും മികച്ച തുടക്കം ലഭിച്ചിട്ടും അത് മുതലെടുക്കാന്‍ കഴിയാത്തതില്‍ നിരാശയുണ്ടെന്ന് ബാബര്‍ പറഞ്ഞു.
പാകിസ്ഥാന്റെ ദക്ഷിണാഫ്രിക്കയ്ക്കെതിരായ ടെസ്റ്റ് ചരിത്രത്തിലെ ഏറ്റവും ഉയര്‍ന്ന ഒന്നാം വിക്കറ്റ് പാര്‍ട്ണര്‍ഷിപ്പാണ് മസൂദും ബാബറും ചേര്‍ന്ന് സ്ഥാപിച്ചത്. പാകിസ്ഥാന്റെ ഒന്നാം ഇന്നിംഗ്‌സ് സ്‌കോറിനെക്കാള്‍ കൂടുതലായിരുന്നു ഈ പാര്‍ട്ണര്‍ഷിപ്പ്. ഇതാണ് ദക്ഷിണാഫ്രിക്കന്‍ ക്യാപ്റ്റന്‍ ടെമ്പ ബാവുമയെ ഫോളോ ഓണ്‍ ചെയ്യിക്കാന്‍ പ്രേരിപ്പിച്ചത്.