വീണ്ടും പൂജ്യനായി രോഹിത്ത്, പിച്ച് മനസ്സിലാക്കി ഗില്ലും ജയ്സ്വാളും, രണ്ടാം ദിനം ഇന്ത്യയ്ക്ക് നിര്‍ണ്ണായകം
പൂനെയില്‍ നടക്കുന്ന ഇന്ത്യ-ന്യൂസിലാന്‍ഡ് രണ്ടാം ടെസ്റ്റിന്റെ ആദ്യ ദിനം ആതിഥേയര്‍ക്ക് അനുകൂലമായിരുന്നു. വാഷിംഗ്ടണ്‍ സുന്ദറിന്റെ മിന്നുന്ന പ്രകടനത്തില്‍ ന്യൂസിലാന്‍ഡ് ഒന്നാം ഇന്നിംഗ്‌സില്‍ 259 റണ്‍സിന് ഓള്‍ ഔട്ടായി. ഏഴ് വിക്കറ്റ് വീഴ്ത്തിയ സുന്ദറാണ് കിവീസ് ബാറ്റിംഗ് നിരയെ തകര്‍ത്തത്.
ടോസ് നേടി ബാറ്റിംഗ് തിരഞ്ഞെടുത്ത ന്യൂസിലാന്‍ഡിന് ഡെവണ്‍ കോണ്‍വേ (76), രചിന്‍ രവീന്ദ്ര (65) എന്നിവര്‍ മികച്ച പ്രകടനം കാഴ്ചവെച്ചു. എന്നാല്‍ സുന്ദര്‍ കിവീസ് ബാറ്റിംഗ് നിരയെ തകര്‍ത്തു. മൂന്ന് വര്‍ഷത്തിന് ശേഷം ടെസ്റ്റ് ടീമിലേക്ക് തിരിച്ചെത്തിയ സുന്ദറിന്റെ പ്രകടനം ശ്രദ്ധേയമായിരുന്നു. രവിചന്ദ്രന്‍ അശ്വിന്‍ മൂന്ന് വിക്കറ്റുകള്‍ വീഴ്ത്തി.
അതെസമയം മറുപടി ബാറ്റിംഗില്‍ ഇന്ത്യയുടെ തുടക്കം മോശമായിരുന്നു. ഒന്‍പത് പന്ത് നേരിട്ട ക്യാപ്റ്റന്‍ രോഹിത് ശര്‍മ പൂജ്യത്തിന് പുറത്തായി. ടിം സൗത്തിയുടെ പന്തില്‍ കുറ്റി തെറിച്ചാണ് രോഹിത്ത് മടങ്ങിയത്. എന്നാല്‍ ശുഭ്മാന്‍ ഗില്‍ (10), യശസ്വി ജയ്സ്വാള്‍ (6) എന്നിവര്‍ ക്രീസില്‍ ഉറച്ചു നിന്നു. ഒന്നാം ദിനം കളി അവസാനിക്കുമ്പോള്‍ ഇന്ത്യ ഒരു വിക്കറ്റ് നഷ്ടത്തില്‍ 16 റണ്‍സ് എന്ന നിലയിലാണ്. പിച്ചിന്റെ സ്വഭാവം നിലവില്‍ സ്പിന്നര്‍മാര്‍ക്ക് അനുകൂലമാണ്. അതിനാല്‍ തന്നെ വളരെ സാവധാനമാണ് ഇന്ത്യ ബാറ്റ് ചെയ്തത്.
രണ്ടാം ദിനത്തിലെ പ്രതീക്ഷകള്‍:
ഒന്നാം ഇന്നിംഗ്‌സില്‍ 9 വിക്കറ്റ് ശേഷിക്കെ 243 റണ്‍സിന് പിന്നിലാണ് ഇന്ത്യ. രണ്ടാം ദിനത്തില്‍ ശുഭ്മാന്‍ ഗില്ലും യശസ്വി ജയ്സ്വാളും ചേര്‍ന്ന് വലിയൊരു കൂട്ടുകെട്ട് കെട്ടിപ്പടുക്കേണ്ടതുണ്ട്. വിരാട് കോഹ്ലി, സര്‍ഫറാസ് ഖാന്‍, റിഷഭ് പന്ത് എന്നിവരില്‍ നിന്നും മികച്ച പ്രകടനം ഇന്ത്യ പ്രതീക്ഷിക്കുന്നു.
ന്യൂസിലാന്‍ഡിനെ കുറഞ്ഞ സ്‌കോറില്‍ പുറത്താക്കാന്‍ കഴിഞ്ഞത് ഇന്ത്യക്ക് വലിയ മുന്‍തൂക്കം നല്‍കുന്നു. രണ്ടാം ദിനത്തില്‍ ഇന്ത്യന്‍ ബാറ്റ്‌സ്മാന്മാര്‍ മികച്ച പ്രകടനം കാഴ്ചവെച്ചാല്‍ മത്സരത്തില്‍ ആധിപത്യം സ്ഥാപിക്കാന്‍ കഴിയും. നിലവില്‍ പരമ്പര 1-0ത്തിന് ഇന്ത്യ പിന്നിലാണ്. ഈ മത്സരം ജയിച്ചാല്‍ മാത്രമെ ഇന്ത്യയ്ക്ക് പരമ്പര സ്വന്തമാക്കാനാകു.