സഞ്ജു അവിഭാജ്യ ഘടകം, ശ്രേയസും ടീമില്‍, രാഹുല്‍ പുറത്ത്, ഇന്ത്യയുടെ ലോകകപ്പ് ടീം
2024-ല്‍ രോഹിത് ശര്‍മ്മയുടെ നേതൃത്വത്തില്‍ നേടിയ ഐതിഹാസിക ടി20 ലോകകപ്പ് കിരീടത്തിന്റെ ആവേശം കെട്ടടങ്ങും മുന്‍പേ, അടുത്ത പോരാട്ടത്തിനുള്ള കളമൊരുങ്ങുകയാണ്. 2026 ഫെബ്രുവരി-മാര്‍ച്ച് മാസങ്ങളിലായി ഇന്ത്യയിലും ശ്രീലങ്കയിലുമായി നടക്കുന്ന അടുത്ത ടി20 ലോകകപ്പില്‍ കിരീടം നിലനിര്‍ത്തുക എന്ന ലക്ഷ്യത്തോടെയാകും ടീം ഇന്ത്യ കളത്തിലിറങ്ങുക. രോഹിത് യുഗത്തിന് ശേഷം, പുതിയ നായകന്‍ സൂര്യകുമാര്‍ യാദവിന്റെ കീഴില്‍ യുവനിരയുമായി എത്തുന്ന ഇന്ത്യയുടെ സാധ്യതാ ടീം എങ്ങനെയായിരിക്കുമെന്ന് പരിശോധിക്കാം.
2025-ലെ ഐപിഎല്‍ സീസണ്‍, ലോകകപ്പ് ടീമിലേക്ക് കണ്ണുവച്ചിരുന്ന പല താരങ്ങള്‍ക്കും തങ്ങളുടെ മികവ് തെളിയിക്കാനുള്ള അവസാന അവസരമായിരുന്നു. സൂര്യകുമാറിന്റെ നായകത്വത്തില്‍ ഇന്ത്യ കളിച്ച 15 മത്സരങ്ങളില്‍ രണ്ടെണ്ണത്തില്‍ മാത്രമാണ് തോല്‍വി വഴങ്ങിയത്. ഈ കണക്കുകള്‍ നല്‍കുന്ന ആത്മവിശ്വാസവുമായാണ് ഗൗതം ഗംഭീര്‍ എന്ന പരിശീലകനും സൂര്യകുമാര്‍ എന്ന നായകനും തങ്ങളുടെ ടീമിനെ വാര്‍ത്തെടുക്കാനൊരുങ്ങുന്നത്.
ഓപ്പണിംഗില്‍ ഗില്ലും ജയ്സ്വാളും തിരിച്ചെത്തുന്നു
ടെസ്റ്റ് ക്രിക്കറ്റിലും ചാമ്പ്യന്‍സ് ട്രോഫിയിലും ശ്രദ്ധ കേന്ദ്രീകരിക്കുന്നതിനായി കഴിഞ്ഞ വര്‍ഷം ടി20 ടീമില്‍ നിന്ന് വിട്ടുനിന്ന ശുഭ്മാന്‍ ഗില്ലും യശസ്വി ജയ്സ്വാളും ഓപ്പണിംഗ് സ്ഥാനത്തേക്ക് തിരിച്ചെത്തുമെന്നാണ് പ്രതീക്ഷിക്കുന്നത്. ഐപിഎല്ലില്‍ മിന്നും പ്രകടനം കാഴ്ചവെച്ച ഇരുവരും ചേരുമ്പോള്‍ ഇന്ത്യയുടെ ടോപ്പ് ഓര്‍ഡര്‍ അതിശക്തമാകും. ഇന്ത്യന്‍ ടെസ്റ്റ് ടീമിന്റെ നായകനായി അടുത്തിടെ തിരഞ്ഞെടുക്കപ്പെട്ട ഗില്‍, ലോകകപ്പില്‍ സൂര്യകുമാറിന്റെ ഉപനായകനായാലും അത്ഭുതപ്പെടാനില്ല. ഇടംകയ്യന്‍ ബാറ്ററും സ്പിന്നറുമായ അഭിഷേക് ശര്‍മ്മയും ടീമിലെ നിര്‍ണായക സാന്നിധ്യമാകും. ഇംഗ്ലണ്ടിനെതിരെ നേടിയ 37 പന്തിലെ സെഞ്ച്വറി അദ്ദേഹത്തിന്റെ ടീമിലെ സ്ഥാനം ഉറപ്പിക്കുന്നു.
മധ്യനിരയില്‍ കരുത്തായി സൂര്യയും ശ്രേയസും
നായകന്‍ സൂര്യകുമാര്‍ യാദവ് നയിക്കുന്ന മധ്യനിരയില്‍ തിലക് വര്‍മ്മയുടെ സ്ഥാനം ചോദ്യം ചെയ്യാനാവാത്തതാണ്. ദക്ഷിണാഫ്രിക്കയ്ക്കെതിരെ നേടിയ തുടര്‍ച്ചയായ രണ്ട് സെഞ്ച്വറികളാണ് തിലകിന് തുണയാകുന്നത്. എന്നാല്‍, ഏവരും ഉറ്റുനോക്കുന്നത് ശ്രേയസ് അയ്യരുടെ തിരിച്ചുവരവാണ്. 2023 ഡിസംബറിന് ശേഷം ഇന്ത്യന്‍ ടി20 ടീമില്‍ കളിച്ചിട്ടില്ലെങ്കിലും, 2025-ലെ ഐപിഎല്ലില്‍ 604 റണ്‍സ് അടിച്ചുകൂട്ടിയും, 2025-ലെ ചാമ്പ്യന്‍സ് ട്രോഫിയില്‍ ഇന്ത്യയുടെ ടോപ് സ്‌കോറര്‍ ആയും മാറിയ ശ്രേയസിനെ ഇനി അവഗണിക്കാന്‍ സാധിക്കില്ല. ടീമിന്റെ നേതൃനിരയിലേക്കും ശ്രേയസിനെ പരിഗണിക്കാവുന്നതാണ്.
വിക്കറ്റ് കീപ്പര്‍ റോളില്‍ സഞ്ജു സ്ഥാനം ഉറപ്പിക്കുന്നു
വിക്കറ്റ് കീപ്പര്‍ ബാറ്ററുടെ റോളില്‍ മലയാളി താരം സഞ്ജു സാംസണ്‍ തന്റെ സ്ഥാനം ഏറെക്കുറെ ഉറപ്പിച്ചു കഴിഞ്ഞു. 2024-ല്‍ ടി20യില്‍ നേടിയ മൂന്ന് സെഞ്ച്വറികളാണ് സഞ്ജുവിനെ ടീമിലെ അവിഭാജ്യ ഘടകമാക്കുന്നത്. രണ്ടാം വിക്കറ്റ് കീപ്പര്‍ സ്ഥാനത്തേക്ക് ഋഷഭ് പന്തിന് കാര്യമായ പ്രകടനം നടത്താന്‍ സാധിക്കാത്തതിനാല്‍ ജിതേഷ് ശര്‍മ്മയും ധ്രുവ് ജുറലും തമ്മിലാകും പ്രധാന മത്സരം. 2025 ഐപിഎല്‍ കിരീടം നേടിയ ആര്‍സിബിക്ക് വേണ്ടി നിര്‍ണായക പ്രകടനം കാഴ്ചവെച്ച ജിതേഷിനാണ് കൂടുതല്‍ സാധ്യത. ടോപ് ഓര്‍ഡറില്‍ മികച്ച താരങ്ങളുള്ളതിനാല്‍ കെ.എല്‍. രാഹുലിന് ടീമിലേക്ക് ഒരു തിരിച്ചുവരവ് പ്രയാസകരമായിരിക്കും.
ഓള്‍റൗണ്ടര്‍മാരും ബൗളിംഗ് നിരയും
ഓള്‍റൗണ്ടര്‍മാരായി ഹാര്‍ദിക് പാണ്ഡ്യയും അക്‌സര്‍ പട്ടേലും ടീമിലെത്തുമെന്ന കാര്യത്തില്‍ സംശയമില്ല. നിലവില്‍ ഇന്ത്യന്‍ ടീമിലെ ഏറ്റവും പ്രധാനപ്പെട്ട രണ്ട് കളിക്കാരാണ് ഇവര്‍. സ്പിന്‍ വിഭാഗത്തില്‍ കുല്‍ദീപ് യാദവും വരുണ്‍ ചക്രവര്‍ത്തിയും തങ്ങളുടെ സ്ഥാനം ഉറപ്പിക്കുന്നു.
2024 ലോകകപ്പ് വിജയത്തില്‍ നിര്‍ണായക പങ്കുവഹിച്ച ജസ്പ്രീത് ബുമ്രയും അര്‍ഷ്ദീപ് സിംഗും ചേര്‍ന്നാകും 2026-ലും ഇന്ത്യയുടെ പേസ് ആക്രമണത്തിന് നേതൃത്വം നല്‍കുക. മൂന്നാം പേസറായി ഹര്‍ഷിത് റാണ എത്തിയേക്കും. മികച്ച പേസും ബാറ്റുചെയ്യാനുള്ള കഴിവുമാണ് ഹര്‍ഷിത്തിന് അനുകൂലമായ ഘടകങ്ങള്‍. ഇനി ടീം മാനേജ്‌മെന്റ് ഒരു അധിക പേസര്‍ക്ക് പകരം ഓള്‍റൗണ്ടറെയാണ് പരിഗണിക്കുന്നതെങ്കില്‍ നിതീഷ് കുമാര്‍ റെഡ്ഡി, വാഷിംഗ്ടണ്‍ സുന്ദര്‍, റിയാന്‍ പരാഗ്, ശിവം ദുബെ എന്നിവരില്‍ ഒരാള്‍ക്ക് നറുക്ക് വീണേക്കാം.
ലോകകപ്പിന് മുന്‍പായി ഏകദേശം 18 ടി20 മത്സരങ്ങള്‍ ഇന്ത്യക്ക് കളിക്കാനുണ്ട്. ഗംഭീറിനും സൂര്യകുമാറിനും വ്യത്യസ്ത കോമ്പിനേഷനുകള്‍ പരീക്ഷിക്കാനും മികച്ച ടീമിനെ തിരഞ്ഞെടുക്കാനും ഇത് ധാരാളം അവസരങ്ങള്‍ നല്‍കും.
2026 ടി20 ലോകകപ്പിനുള്ള ഇന്ത്യയുടെ സാധ്യതാ ടീം:
- സൂര്യകുമാര്‍ യാദവ് (ക്യാപ്റ്റന്‍)
- ശുഭ്മാന്‍ ഗില്‍ (വൈസ് ക്യാപ്റ്റന്‍)
- യശസ്വി ജയ്സ്വാള്‍
- അഭിഷേക് ശര്‍മ്മ
- ശ്രേയസ് അയ്യര്‍
- തിലക് വര്‍മ്മ
- സഞ്ജു സാംസണ്‍ (വിക്കറ്റ് കീപ്പര്‍)
- ജിതേഷ് ശര്‍മ്മ (വിക്കറ്റ് കീപ്പര്‍)
- ഹാര്‍ദിക് പാണ്ഡ്യ
- അക്‌സര്‍ പട്ടേല്‍
- കുല്‍ദീപ് യാദവ്
- വരുണ്‍ ചക്രവര്‍ത്തി
- ജസ്പ്രീത് ബുമ്ര
- അര്‍ഷ്ദീപ് സിംഗ്
- ഹര്‍ഷിത് റാണ
