ആ ചരിത്ര സെഞ്ചുറി ആഘോഷിക്കാത്തതിന് കാരണമുണ്ട്, ആഘോഷങ്ങൾ ഇനിയില്ല ; തുറന്നടിച്ച് സഞ്ജു

ദക്ഷിണാഫ്രിക്കയ്‌ക്കെതിരായ നാലാം ടി20യിൽ ചരിത്ര സെഞ്ചുറി നേടിയെങ്കിലും സഞ്ജു സാംസൺ അമിതമായി ആഹ്ലാദപ്രകടനം നടത്തിയിരുന്നില്ല. ഹെൽമെറ്റ് പോലും ഊരാതെയാണ് അദ്ദേഹം സെഞ്ച്വറി ആഘോഷിച്ചത്. മത്സരശേഷം സെഞ്ച്വറിയെക്കുറിച്ച് ചോദിച്ചപ്പോൾ, അധികമൊന്നും പറയാനില്ലെന്നായിരുന്നു സഞ്ജുവിന്റെ പ്രതികരണം.

എന്നാൽ കരിയറിലെ ഏറ്റക്കുറച്ചിലുകളെക്കുറിച്ചും തന്റെ മാനസികാവസ്ഥയെക്കുറിച്ചും സഞ്ജു തുറന്നുപറഞ്ഞു. തുടർച്ചയായി രണ്ട് സെഞ്ച്വറികൾ നേടിയ ശേഷം രണ്ട് മത്സരങ്ങളിൽ പൂജ്യത്തിന് പുറത്തായത് തന്നെ വല്ലാതെ ബാധിച്ചുവെന്ന് അദ്ദേഹം വെളിപ്പെടുത്തി.

എന്നാൽ, ഈ തിരിച്ചടികളിൽ നിന്ന് തളരാതെ കഠിനാധ്വാനം ചെയ്തതാണ് ഇന്നത്തെ വിജയത്തിലേക്ക് നയിച്ചതെന്ന് സഞ്ജു പറഞ്ഞു. മത്സരത്തിൽ അഭിഷേക് ശർമ്മയും തിലക് വർമ്മയും നൽകിയ പിന്തുണയ്ക്കും അദ്ദേഹം നന്ദി പറഞ്ഞു.

സഞ്ജുവിന്റെ വാക്കുകൾ:

"ഇപ്പോൾ പറയാൻ പ്രയാസമാണ്, കാരണം ഞാൻ ഇപ്പോഴും വളരെ വേഗത്തിൽ ശ്വസിക്കുന്നു. എന്റെ ജീവിതത്തിൽ ഞാൻ നിരവധി പരാജയങ്ങൾ നേരിട്ടിട്ടുണ്ട്, രണ്ട് സെഞ്ച്വറികൾ നേടിയ ശേഷം രണ്ട് ഡക്കുകൾ, ഞാൻ എന്നിൽത്തന്നെ വിശ്വസിച്ചു, കഠിനാധ്വാനം ചെയ്തു, അത് ഇന്ന് ഫലം കണ്ടു. രണ്ട് പരാജയങ്ങൾക്ക് ശേഷം, എന്റെ മനസ്സിൽ നിരവധി കാര്യങ്ങൾ നടക്കുന്നുണ്ടായിരുന്നു, അഭിഷേക് തുടക്കത്തിൽ എന്നെ സഹായിച്ചു, പിന്നീട് തിലകും," സഞ്ജു പറഞ്ഞു.

രണ്ട് തുടർ സെഞ്ചുറികൾ നേടിയിട്ടും രണ്ട് ഇന്നിങ്‌സുകളിൽ പരാജയപ്പെട്ടപ്പോൾ താൻ ആക്രമിക്കപ്പെട്ടത് താരത്തിനെ നന്നായി വിഷമിപ്പിച്ചുവെന്ന് വാക്കുകളിൽ വ്യക്തമായിരുന്നു. അതിനിടെയാണ് എരിതീയിൽ എണ്ണയൊഴിക്കുന്ന സമീപനവുമായി സഞ്ജുവിന്റെ അച്ഛന്റെ വിവാദമായ അഭിപ്രായ പ്രകടനവും.. ഇതോടെ വിമർശന ശരങ്ങൾക്ക് മൂർച്ച കൂടി. എന്നാൽ നാലാം ടി20യിലെ സെഞ്ചുറിയോടെ വിമർശകരുടെ വായടപ്പിക്കാൻ സഞ്ജുവിനായി .

ഇന്ത്യയുടെ ഇന്നിംഗ്‌സ്:

സഞ്ജു സാംസണിന്റെയും തിലക് വർമ്മയുടെയും സെഞ്ച്വറികളുടെ പിൻബലത്തിൽ ഇന്ത്യ 20 ഓവറിൽ ഒരു വിക്കറ്റ് നഷ്ടത്തിൽ 283 റൺസ് എന്ന കൂറ്റൻ സ്കോർ നേടി. മറുപടി ബാറ്റിംഗിനിറങ്ങിയ ദക്ഷിണാഫ്രിക്കയ്ക്ക് 18.2 ഓവറിൽ 148 റൺസിന് പുറത്താകേണ്ടി വന്നു.

സാംസണും അഭിഷേക് ശർമ്മയും ചേർന്ന് ഇന്ത്യയ്ക്ക് വേണ്ടി ഓപ്പൺ ചെയ്തു, 73 റൺസിന്റെ കൂട്ടുകെട്ടുണ്ടാക്കി. പിന്നീട് തിലക് വർമ്മയുമായി ചേർന്ന് സഞ്ജു 210 റൺസിന്റെ കൂട്ടുകെട്ട് ഉണ്ടാക്കി.

മറ്റ് പ്രധാന സംഭവങ്ങൾ:

• സഞ്ജു സാംസണും തിലക് വർമ്മയും ചേർന്ന് ടി20 ചരിത്രത്തിലെ ഏറ്റവും ഉയർന്ന കൂട്ടുകെട്ട് (210 റൺസ്) സ്ഥാപിച്ചു.
• ഇന്ത്യ 135 റൺസിന് വിജയിച്ചു പരമ്പര 3-1ന് സ്വന്തമാക്കി.

ദക്ഷിണാഫ്രിക്കയ്‌ക്കെതിരായ മികച്ച പ്രകടനത്തിലൂടെ സഞ്ജുവും തിലക് വർമ്മയും ഇംഗ്ലണ്ടിനെതിരായ ടി20 പരമ്പരയിലും ടീമിൽ സ്ഥാനം ഉറപ്പിച്ചു.