ഡല്‍ഹിയുടെ കോച്ചായി സാക്ഷാല്‍ വീരു വരുന്നു, വമ്പന്‍ നീക്കവുമായി ക്യാപിറ്റല്‍സ്
ഇന്ത്യന്‍ പ്രീമിയര്‍ ലീഗിന്റെ പുതിയ സീസണ്‍ അടുത്തിരിക്കെ, ഡല്‍ഹി ക്യാപിറ്റല്‍സ് ടീമില്‍ വലിയ മാറ്റങ്ങള്‍ക്ക് സാക്ഷ്യം വഹിക്കാന്‍ സാധ്യതയുണ്ട്. റിക്കി പോണ്ടിംഗ് മുഖ്യ പരിശീലക സ്ഥാനത്തുനിന്ന് പടിയിറങ്ങിയതോടെ, ആ സ്ഥാനത്തേക്ക് മുന്‍ ഇന്ത്യന്‍ താരം വീരേന്ദര്‍ സെവാഗിനെ പരിഗണിക്കുന്നതായി റിപ്പോര്‍ട്ടുകള്‍ സൂചിപ്പിക്കുന്നു.
സെവാഗിന്റെ ഡല്‍ഹി ബന്ധം
ഒരു കാലത്ത് ഡല്‍ഹി ടീമിന്റെ ഐക്കണ്‍ താരമായിരുന്ന സെവാഗ്, ടീമിനെ നയിക്കുകയും ചെയ്തിട്ടുണ്ട്. അദ്ദേഹത്തിന്റെ വരവ് ടീമിന് കൂടുതല്‍ ആരാധകരെ ആകര്‍ഷിക്കുമെന്നും ടീമിന്റെ പ്രകടനത്തില്‍ പുത്തനുണര്‍വ് പകരുമെന്നും ടീം മാനേജ്‌മെന്റ് പ്രതീക്ഷിക്കുന്നു.
വെടിക്കെട്ട് ബാറ്റിംഗ്
സെവാഗിന്റെ കടന്നാക്രമിക്കുന്ന ബാറ്റിംഗ് ശൈലി ഡല്‍ഹി ടീമിനെയും സ്വാധീനിച്ചേക്കാം. നിലവില്‍ ടീമിന് വെടിക്കെട്ട് ബാറ്റ്‌സ്മാന്‍മാരുടെ അഭാവം അനുഭവപ്പെടുന്നുണ്ട്. സെവാഗിന്റെ വരവോടെ ഈ പ്രവണതയ്ക്ക് മാറ്റം വരുമെന്നാണ് പ്രതീക്ഷ.
ടീമില്‍ വലിയ മാറ്റങ്ങള്‍
സെവാഗ് പരിശീലകനായാല്‍ ടീമില്‍ വലിയ അഴിച്ചുപണികള്‍ പ്രതീക്ഷിക്കാം. പൃഥ്വി ഷാ, റിഷഭ് പന്ത്, മിച്ചല്‍ മാര്‍ഷ്, അക്ഷര്‍ പട്ടേല്‍ എന്നിവരെ നിലനിര്‍ത്തിയേക്കാമെങ്കിലും മറ്റ് താരങ്ങളെ ഒഴിവാക്കാനാണ് സാധ്യത. സെവാഗ് വെടിക്കെട്ട് ബാറ്റ്‌സ്മാന്‍മാരെ ടീമിലെത്തിക്കാന്‍ ശ്രമിക്കും. നിക്കോളാസ് പൂരന്‍ പോലുള്ള ചെറിയ ഇന്നിംഗ്‌സുകള്‍ കൊണ്ട് പോലും മത്സരത്തിന്റെ ഗതി മാറ്റാന്‍ കഴിയുന്ന താരങ്ങളെയായിരിക്കും സെവാഗ് ലക്ഷ്യമിടുക. രോഹിത് ശര്‍മ്മ മുംബൈ ഇന്ത്യന്‍സ് വിട്ടാല്‍ സെവാഗ് അദ്ദേഹത്തെ സ്വന്തമാക്കാന്‍ ശ്രമിച്ചേക്കാം.
സെവാഗിന്റെ വെല്ലുവിളികള്‍
ഡല്‍ഹിക്കാരനായ സെവാഗ് പരിശീലകനെന്ന നിലയില്‍ വലിയ നേട്ടങ്ങള്‍ സ്വപ്നം കാണുന്നുണ്ട്. എന്നാല്‍ പരിശീലകനെന്ന നിലയില്‍ അദ്ദേഹത്തിന്റെ മുന്‍കാല പ്രകടനങ്ങള്‍ അത്ര മികച്ചതായിരുന്നില്ല. പഞ്ചാബ് കിംഗ്‌സിന്റെ പരിശീലകനായിരിക്കെ, മികച്ച ടീമിനെ വാര്‍ത്തെടുക്കാനോ താരങ്ങളില്‍ പോരാട്ടവീര്യം നിറയ്ക്കാനോ സെവാഗിന് കഴിഞ്ഞില്ല.
പ്രഥമ സീസണ്‍ മുതല്‍ പല ഇതിഹാസങ്ങളും കളിക്കുകയും പരിശീലിപ്പിക്കുകയും ചെയ്തിട്ടും ഡല്‍ഹിക്ക് ഇതുവരെ കിരീടം നേടാനായിട്ടില്ല. അനാവശ്യമായ അഴിച്ചുപണികളും, ശ്രേയസ് അയ്യരെ മാറ്റി റിഷഭ് പന്തിനെ ക്യാപ്റ്റനാക്കിയതു പോലുള്ള തീരുമാനങ്ങളും ടീമിന്റെ പ്രകടനത്തെ ബാധിച്ചു.
സെവാഗിന്റെ കീഴില്‍ ഡല്‍ഹിക്ക് കന്നി കിരീടം നേടാനാകുമോ?
എന്തായാലും സെവാഗ് പരിശീലക സ്ഥാനത്തെത്തുന്നത് ഡല്‍ഹി ക്യാപിറ്റല്‍സിന് പുതിയൊരു തുടക്കമാകുമെന്നുറപ്പ്. അദ്ദേഹത്തിന്റെ നേതൃത്വത്തില്‍ ടീം കന്നി കിരീടം നേടുമോ എന്നറിയാന്‍ ആരാധകര്‍ ആകാംക്ഷയോടെ കാത്തിരിക്കുകയാണ്.
